PREFACE DE M. MICHEL NOSTRADAMVS A

                                           ses Propheties.

              Ad Caesarem Nostradamum filium, VIE ET FELICITE.


   TON TARD aduenement CESAR NOSTRADAME mon filz, m'a faict mettre mon long temps par continuelles vigilations nocturnes reserer par escipt, toy delaisser memoire, apres la corporelle extinction de ton progeniteur, au commun proffit des humains, de ce que la diuine essence par Astronomiques reuolutions m'ont donne’ congnoissance.
   Et depuis qu'il a` pleu au Dieu immortel que tu ne sois venu en naturelle lumiere dans ceste terrene plaige, & ne veulx dire tes ans qui ne sont encores accompaignez, mais tes moys Martiaulx incapables a` receuoir dans ton debile entendement ce que ie seray contrainct apres mes iours desiner:: veu qu'il n'est possible te laisser par escript ce que seroit par l'iniure du temps oblitere’: car la parolle hereditaire de l'occulte prediction sera dans mon estomach intercluse: considerant aussi les aduentures de l’humain definiment estre incertaines, & que le tout est regi & gouuerne’ par la puissance de Dieu inextimable, nous inspirant non par bacchante fureur, ne par limphatique mouuement, mais par astronomiques assertions.
   Soli numine diuino afflati praesagiunt & spiritu prophetico particularia.
    Combien que de long temps par plusieurs fois i'aye predict long temps au parauant ce que depuis est aduenu, & en particulieres regions, attribuant le tout estre faict par la vertu & inspiration diuine, & autres felices & sinistres aduentures de acceleree promptitude prononcees, que despuis sont aduenues par les climatz du monde: ayant voulu taire & delaisse’ pour cause de l'iniure, & non tant seulement du temps present, mais aussi de la plus grande part du futur, de mettre par escript, pource que les regnes, sectes, & religions feront changes si opposites, voire au respect du present diametralement, que si ie venois a` reserer ce que a` l'aduenir sera, ceulx de regne, secte, religion, & foy, trouueroient si mal accordant a` leur fantasie auriculaire, qu'ilz viendroient a` damner ce que par les siecles aduenir on cognoistra estre veu & apperceu.
    Considerant aussi la sentence du vray Sauueur: Nolite sanctum dare canibus, nec mittatis margaritas ante porcos ne conculcent pedibus & conuersi dirumpant vos. Qui a` este’ la cause de faire retirer ma langue au populaire, & la plume au papier puis me suis voulu estendre declarant pour le commun aduenement, par obstruses & perplexes sentences les causes futures, mesmes les plus vrgentes, & celles que i'ay apperceu, quelque humaine mutation que aduienne ne scandalizer l'auriculaire fragilite’, & le tout escript soubs figure nubileuse, plus que du tout prophetique combien que, Abscondisti haec a` sapientibus, & prudentibus, id est, potentibus et regibus, & enucleasti ea exiguis & tenuibus,  & aux Prophetes: par le moyen de Dieu immortel, & des bons anges ont receu l'esprit de vaticination, par lequel ilz voient les causes loingtaines, & viennent a` preuoir les futurs aduenements: car rien ne se peult paracheuer sans luy, ausquelz si grande est la puissance & la bonte’ aux subiectz, que pendant qu'ilz demeurent en eulx, toutesfois aux autres effectz subiectz, pour la similitude de la cause du bon genius;,celle chaleur & puissance vaticinatrice s'approche de nous: comme il nous aduient des rayons du Soleil, qui se viennent gettants leur influence aux corps elementaires, & non elementaires.
   Quant a` nous qui sommes humains ne pouuons rien de notre naturelle congnoissance & inclination d'engin, congnoistre des secretz obstruses de Dieu le Createur: Quia non est nostrum noscere tempora, nec momenta &c.
   Combien que aussi de present peuuent aduenir & estre personnaiges, que Dieu le createur aye voulu reueler par imaginatiues impressions, quelques secretz de l'aduenir, accordes a` l'astrologie iudicielle, comme du passe’, que certaine puissance & voluntaire faculte’ venoit par eulx, comme flambe de feu apparoir, que luy inspirant on venoit a` iuger les diuines & humaines inspirations.
   Car les oeuures diuines, que totallement sont absolues, Dieu les vient paracheuer: la moyenne qui est au millieu les Anges : la troisiesme les mauuais.
    Mais mon filz ie te parle icy vn peu trop obstrusement: mais quant aux occultes vaticinations que on vient a` receuoir par le subtil esperit du feu qui quelque fois par l'entendement agite contemplant le plus hault des astres, comme estant vigilant, mesmes que aux prononciations estant surprins escriptz prononcant sans crainte moins attainct d'inuercunde loquacite’ : mais quoy? tout procedoit de la puissance diuine du grand Dieu eternel, de qui toute bonte’ procede.
   Encores, mon filz, que i'aye insere’ le nom de prophete, ie ne me veulx attribuer tiltre de si haulte sublimite’ pour le temps present : car qui propheta dicitur hodie, olim vocabatur videns : car prophete proprement, mon filz, est celuy qui voit choses loingtaines de la congnoissance naturelle de toute creature.
    Et cas aduenant que le prophete moyennant la parfaicte lumiere de la prophetie, luy appaire manifestement des choses diuines, comme humaines: que ce ne peult faire, veu les effectz de la future prediction s'estendent loing.
    Car les secretz de Dieu sont incomprehensibles, & la vertu effectrice contingent de longue estendue de la congnoissance naturelle, prennent leur plus prochain origine du liberal arbitre, faict apparoir les causes qui d'elles mesmes ne peuuent acquerir celle notice pour estre congnues, ne par les humains augures, ne par autre congnoissance ou vertu occulte, comprinse soubz la concauite’ du ciel,  mesme du faict present de la totale eternite’, que vient en soy embrasser tout le temps.
   Mais moyennant quelque indiuisible eternite’, par comitiale agitation Hiraclienne, les causes par le celeste mouuement sont congnues.
   Ie ne dis pas, mon filz, affin que bien l'entendes , que la congnoissance de ceste matiere ne se peult encores imprimer dans ton debile cerueau, que les causes futures bien loingtaines ne soyent a` la congnoissance de la creature raisonable : si sont nonobstant bonnement la creature de l'ame intellectuelle des causes presentes loingtaines, ne luy sont du tout ne trop occultes, ne trop reserees: mais la parfaicte des causes notices ne se peult acquerir sans celle diuine inspiration : veu que toute inspiration prophetique recoit prenant son principal principe mouant de Dieu le createur, puis de l'heur, & de nature.
   Parquoy estans les causes indifferantes,  indifferentement produictes, & non produictes, le presaige partie aduient, ou a` este’ predit.
   Car l'entendement cree intellectuellement ne peult voir occultement, sinon par la voix faicte au lymbe moyennant la exigue flamme en quelle partie les causes futures se viendront a` incliner.
   Et aussi mon filz, ie te supplie que iamais tu ne vueilles emploier ton entendement a` telles resueries & vanites qui seichent le corps & mettent a’ perdition l'ame, donnant trouble au foyble sens : mesmes la vanite’ de la plus que execrable magie reprouuee iadis par les sacrees escritures, & par les diuins canons, au chef duquel est exepte’ le iugement de l'astrologie iudicielle: par laquelle & moyennant inspiration & reuelation diuine par continuelles supputations, auons noz propheties redige’ par escrit.
   Et combien que celle occulte Philosophie ne fusse reprouuee, n'ay onques voulu presenter leurs effrenees persuasions:combien que plusieurs volumes qui ont este’ caches par longz siecles ne sont estes manifestes.
   Mais doutant ce qui aduiendroit en ay faict apres la lecture, present a` Vulcain , que ce pendant qu'il les venoit a` deuorer la flame leschant l'air rendoit vne clarte’ insolite, plus claire que naturelle flamme, comme lumiere de feu de clystre fulgurant, illuminant subit la maison, comme si elle fust este’ en subite conflagration.
   Parquoy affin que a` l'aduenir ne feusses abuse’, perscrutant la parfaicte transformation tant seline que solitaire, & soubz terre metaulx incorruptibles, & aux vndes occultes, les ay en cendres conuertis.
    Mais quant au iugement qui se vient paracheuer, moyennant  le iugement celeste, cela te veulx ie manifester: parquoy auoir congnoissance des causes futures, reiectant loing les fantastiques imaginations qui aduiendront, limitant la particularite’ des lieux, par diuine inspiration supernaturelle: accordant aux celestes figures, les lieux, & vne partie du temps de propriete’ occulte par vertu, puissance, & faculte’ diuine: en presence de laquelle les trois temps sont comprins par eternite’,  reuolution tenant a` la cause passee,presente & future: quia omnia funt nuda & aperta, &c.
   Parqoy mon filz, tu peulx facilement  nonobstant ton tendre cerueau, comprendre que les choses qui doiuent aduenir, se peuuent prophetizer par les nocturnes & celestes lumieres, que sont naturelles, & par l'esprit de prophetie: non que ie me vueille attribuer nomination ny effect prophetique, mais par reuelee inspiration, comme homme mortel, esloigne non moins de sens au ciel, que des piedz en terre.
    Possum non errare, falli, decipi: suis pecheur plus grand que nul de ce monde, subiect a` toutes humaines afflictions.  
    Mais estant surprins par fois la sepmaine limphatiquant, & par longue calculation, rendant les estudes nocturnes de souefue odeur, i'ay compose’ liures de propheties, contenant chascun cent quatrains astronomiques de propheties lesquelles i'ay vn peu voulu raboter obscurement: & sont perpetuelles vaticinations, pour d'icy a` l'annee 3797.
   Que possible fera retirer le front a` quelques vns, en voyant si longue extension, & par soubz toute la concauite’ de la Lune aura lieu et intelligence: & ce entendant vniversellement par toute la terre les causes, mon filz.
    Que si tu vis l'aage naturel & humain tu verras deuers ton climat, au propre ciel de ta natiuite’, les futures aduentures preuoir.
    Combien que le seul Dieu eternel, soit celuy seul qui congnoit l'eternite’ de sa lumiere, procedant de luy mesmes: & ie dis franchement que a` ceulx a` qui sa magnitude immense,( qui est sans mesure & incomprehensible,) ha voulu par longue inspiration melancolique reueler, que moyennant icelle cause occulte manifestee diuinemernt: principalement de deux causes principales, qui sont comprinses a` l'entendement de celuy inspire’ qui prophetise, l'vne est qui vient a` infuser, esclarcissant la lumiere supernaturelle, au personnaige qui predit par la doctrine des Astres, & prophetise par inspiree reuelation: laquelle est vne certaine participation de la diuine eternite’, moyennant le prophete vient a` iuger de cela que son diuin esperit luy a` donne’ par le moyen de Dieu le createur, & par vne naturelle instigation: c'est assauoir que ce que predit, est vray, & a` prins son origine ethereement : & telle lumiere & flambe exigue est de toute efficace, & de telle altitude, non moins que la naturelle clarte’, & naturelle lumiere rend les philosophes si asseures, que moyennant les principes de la premiere cause ont attainct a` plus profondes abysmes de plus hautes doctrines.
    Mais a` celle fin mon filz, que ie ne vague trop pronfondement pour la capacite’ future de ton sens, & aussi que ie trouue que les lettres feront si grande & incomparable iacture, que ie trouue le monde auant l'vniverselle conflagration aduenir tant de deluges & si hautes inundations, qu'il ne sera guieres terroir qui ne soit couuert d'eau: & sera par si long temps que hors mis enographies et topographies, que le tout ne soit peri: aussi auant telles & après inundations, en plusieurs contrees les pluyes seront si exigues, & tombera du ciel si grande abondance de feu, & de pierres candentes, qui ny demourera rien qu'il ne soit consumme’: & cecy aduenir , en brief, & auant la derniere conflagration .
    Car encores que la planette de Mars paracheue son siècle, & a` la fin de son dernier periode, si le reprendra il: mais assembles les vns en Aquarius par plusieurs annees, les autres en Cancer par plus longues & continues.
   Et maintenant que sommes conduictz par la lune, moyennant la totale puissance de Dieu eternel, que auant qu'elle aye paracheue’ son total circuit, le soleil viendra, & puis Saturne.
   Car selon les signes celestes le regne de Saturne sera de retour, que le tout calcule’, le monde, s'approche, d'vne anaragonique reuolution: & que de present que cecy i'escriptz auant cent septante sept ans trois moys vnze iours, par pestilence, longue famine, & guerres, & plus par les inundations le monde entre cy & ce terme prefix, auant & apres par plusieurs foys, sera si diminue, & si peu de monde sera, que lon ne trouuera qui vueille prendre les champs, qui deuiendront liberes aussi longuement qu'ilz sont estes en seruitude: & ce quant au visible iugement celeste, que encores que nous soyons au septiesme nombre de mille qui paracheue le tout, nous approchant du huictiesme ou est le firmament de la huictiesme sphere, que est en dimension latitudinaire, ou le grand Dieu eternel viendra paracheuer la reuolution:ou les images celestes retourneront a` se mouuoir, & le mouuement superieur qui nous rend la terre stable & ferme, non inclinabitur in saeculum saeculi : hors mis que son vouloir sera accomply, ce sera, mais non point autrement: combien que par ambigues opinions
excedants toutes raisons naturelles par songes Mahometiques, aussi aucune fois Dieu le createur par les ministres de ses messagiers de feu en flamme missiue vient a` proposer aux sens exterieurs mesmement a` noz yeulx, les causes de future prediction significatrices du cas futur, qui se doit a` celuy qui presaige manifester.
    Car le presaige qui se faict de la lumiere exterieure vient infalliblement a` iuger partie auecques &  moyennant le lume exterieur: combien vrayement que la partie qui semble auoir par l'oeil de l'entendement, ce que n'est par la lesion du sens imaginatif, la raison est par trop euidente, le tout estre predict par afflation de diuinite’, & par le moyen de l'esprit angelique inspire’ a` l'homme prophetisant, rendant oinctes de vaticinations, le venant a` illuminer, luy esmouuant le deuant de la phantasie par diuerses nocturnes apparitions, que par diurne certitude prophetise par administration astronomique, conioincte de la sanctissime future prediction, ne considerant ailleurs que au couraige libre.
   Vient asture entendre mon filz, que ie trouue par mes reuolutions que sont accordantes a` reuelee inspiration, que le mortel glaiue s'aproche de nous maintenant, par peste, guerre plus horrible que a` vie de trois hommes n'a` este’, & famine, lequel tombera en terre, & y retournera souuent , car les Astres s'accordent a` la reuolution: & aussi a` dict: Visitabo in virga ferrea iniquitates eorum, & in verberibus percutiam eos, car la misericorde du Seigneur ne sera point dispergee vn temps, mon filz, que la pluspart de mes propheties seront accomplies, & viendront estre par accomplissement reuolues.
   Alors par plusieurs fois durant les sinistres tempestes. Conteram ego, dira le Seigneur, & consringam, & non miserebor: & mille autres aduentures, qui aduiendront par eaux & continuelles pluyes, comme plus a` plain i'ay redige’ par escript, aux miennes autres propheties, qui sont composees tout au long, in soluta oratione, limitant les lieux, temps, & le terme prefix que les humains apres venuz, verront, congnoissants les aduentures aduenues infalliblement, comme auons note’ par les autres, parlans plus clairement: nonobstant que soubz nuee seront comprises les intelligences: sed quando sub mouenda erit ignorantia, le cas sera plus esclairci.
   Faisant fin, mon filz, prens donc ce don de ton pere M. Nostradamus, esperant toy declarer vne chascune prophetie des quatrains icy mis.
   Priant au Dieu immortel, qu'il te vueille prester vie longue, en bonne & prospere felicite’.
 De Salon ce premier de Mars. 1555