1.1 ESTANT assis de nuit secret estude,
Seul repose sus la selle d'aerain,
Flambe exigue sortant de solitude,
Faict prosperer qui n'est a croire vain.
1.2 La verge en main mise au millieu de BRANCHES
De l'onde il moulle & le limbe & le pied.
Vn peur & voix fremissent par les manches,
Splendeur diuine.Le diuin pres s'assied.
1.3 Quand la lictiere du tourbillon versee,
Et seront faces de leurs manteaux couuers,
La republique par gens nouueaux vexee,
Lors blancs & rouges iugeront a l'enuers
1.4 Par l'vniuers sera faict vn monarque,
Qu'en paix & vie ne sera longuement:
Lors se perdra la piscature barque,
Sera regie en plus grand detriment.
1.5 Chasses seront faire long combat
Par le pays seront plus fort greues:
Bourg & cite auront plus grand debat,
Carcas.Narbonne auront coeurs esprouues
1.6 L'oeil de Ravenne sera destitue,
Quand a ses piedz les aelles failliront,
Les deux de Bresse auront constitue
Turin, Verseil que Gauloys fouleront.
1.7 Tard arriue l'execution faicte
Le vent contraire, lettres au chemin prinses
Les coniures. xiiii. d'vne secte
Par le Rousseau senez les entreprinses
1.8 Combien de foys prinse cite solaire
Seras,changeant les loys barbares & veines.
Ton mal s'approche : Plus seras tributaire
La grand Hadrie reourira tes vaines.
1.9 De l'Orient viendra le coeur punique
Fascher Hadrie & les hoirs Romulides,
Acompaigne de la classe Libycque,
Trembler Mellites: & proches isles vuides
1.10 Serpens transmis dens la caige de fer
Ou les enfans septains du roy sont pris:
Les vieux & peres sortiront bas de l'enfer,
Ains mourir voir de fruict mort & crys.
1.11 Le mouuemente de sens,coeur, piedz, & mains
Seront d'acord. Naples,Leon, Secille,
Glaifues, feus, eaux : puis aux nobles Romains
Plonges tues mors par cerueau debile.
1.12 Dans peu dira faulce brute, fragile,
De bas en hault esleue promptement:
Puis en instant desloyale & labile
Qui de Veronne aura gouuernement.
1.13 Les exiles par ire, haine intestine,
Feront au roy grand coniuration:
Secret mettront ennemis par la mine,
Et ses vieux siens contre eux sedition
1.14 De gent esclaue chansons chantz & requestes,
Captifz par princes & seigneur aux prisons:
A l'auenir par idiotz sans testes
Seront receuz par diuins oraisons.
1.15 Mars nous menasse par sa force bellique
Septante foys fera le sang espandre:
Auge & ruyne de l'Ecclesiastique
Et plus ceux qui deux rien voudront entendre.
1.16 Faulx a l'estang ioinct vers le Sagitaire
En son hault AVGE de l'exaltation,
Peste,famine,mort de main militaire:
Le siecle approche de renouation.
1,17 Par quarante ans l'Iris n'aparoistra,
Par quarante ans tous les iours sera veu:
La terre aride en siccite croistra,
Et grans deluges quand sera aperceu.
1,18 Par la discorde negligence Gauloise
Sera passaige a Mahommet ouuert:
De sang trempe la terre & mer Senoise
Le port Phocen de voilles & nefz couuert
1.19 Lors que serpens viendront circuir l'are,
Le sang Troyen vexe par les Espaignes
Par eulx grand nombre en sera faicte tare,
Chef, fuict cache aux mares dans les saignes
1.20 Tours,Orleans, Bloys, Angiers, Reims, & Nantes
Cites vexees par subit changement:
Par langues estranges seront tendues tentes
Fleuues, dards Renes, terre & mer tremblement.
1.21 Profonde argille blanche nourrir rochier,
Qui d'vn abisme istra lacticineuse,
En vain troubles ne l'oseront toucher
Ignorans estre au fond terre argilleuse.
1.22 Ce que viura & n'ayant aucun sens,
Viendra leser a mort son artifice:
Autun, Chalon, Langres & les deux Sens,
La gresle & glace fera grand malefice.
1.23 Au mois troisiesme se leuant le Soleil,
Sanglier, Liepard, au champ Mars pour combatre:
Liepard laisse, au ciel extend son oeil,
Vn Aigle autour du Soleil voit s'esbatre.
1.24 A cite neufue pensif pour condemner,
Loisel de proye au ciel se vient offrir:
Apres victoire a captifz pardonner,
Cremone & Mantoue grans maulx aura souffert.
1.25 Perdu, trouue, cache de si long siecle
Sera pasteur demi Dieu honore,
Ains que la Lune acheue son grand siecle
Par autres veutx sera deshonore.
1.26 Le grand du fouldre tumbe d'heure diurne,
Mal & predict par porteur postulaire
Suiuant presaige tumbe d'heure nocturne,
Conflit Reims Londres, Etrusque pestifere
1.27 Dessoubz de chaine Guien du ciel frappe,
Non loing de la est cache le tresor,
Qui par longs siecles auoit este grappe,
Trouue mourra : l'oeil creue de ressort.
1.28 La tour de Bouq craindra fuste Barbare,
Vn temps, long temps apres barque hesperique,
Bestail, gens, meubles tous deux feront grant tare
Taurus & Libra quelle mortelle picque?
1.29 Quand le poisson terrestre & aquatique
Par forte vague au grauier sera mis,
Sa forme estrange suaue & horrifique,
Par mer aux murs bien tost les ennemis.
1.30 La nef est estrange par le tourment marin
Abourdera pres de port incongneu,
Nonobstant signes de rameau palmerin
Apres mort, pille : bon auis tard venu
1.31 Tant d'ans les guerres en Gaule dureront,
Oultre la course du Castulon monarque,
Victoire incerte trois grands couronneront
Aigle, coq, lune, lyon, soleil en marque.
1.32 Le grand empire sera tost translate
En lieu petit qui bien tost viendra croistre:
Lieu bien infime d'exigue comte
Ou au milieu viendra poser son sceptre
1.33 Pres d'vn grand pont de plaine spatieuse,
Le grand lyon par force Cesarees
Fera abbatre hors cite rigoureuse,
Par effroy portes luy seront reserees.
1.34 L'oyseau de proye volant a la senestre
Auant conflict faict aux Francoys pareure
L'vn bon prendra,l'vn ambigue sinistre,
La partie foyble tiendra par bon augure
1.35 Le lyon ieune le vieux surmontera,
En champ bellique par singulier duelle,
Dans caige d'or les yeulx luy creuera:
Deux classes vne, puis mourir, mort cruelle.
1.36 Tard le monarque se viendra repentir
De n'auoir mis a mort son aduersaire:
Mais viendra bien a plus hault consentir
Que tout son sang par mort fera deffaire.
1.37 Vn peu deuant que le soleil s'esconse
Conflict donne,grand peuple dubieux:
Proffliges, port marin ne faict responce,
Pont & sepulchre en deux estranges lieux.
1.38 Le Sol & l'aigle au victeur paroistront:
Responce vaine au vaincu l'on asseure,
Par cor ne crys harnois n'arresteront
Vindicte,paix par mort si acheue a l'heure
1.39 De nuict dans lict le supresme estrangle
Pour trop auoir subiourne, blond esleu,
Par troys l'empire subroge exancle,
A morte mettra carte, pacquet ne leu
1.40 La trombe faulse dissimulant folie
Fera Bisance vn changement de loix:
Hystra d'Egypte qui veult que l'on deslie
Edict changeant monnoyes & aloys.
1.41 Siege en cite est de nuict assallie,
Peu eschape : non loing de mer conflict.
Femme de ioye,retours filz defaillie
Poison & lettres cachees dans le plic
1.42 Le dix Kalendes d'Auril de faict Gotique
Resuscite encor par gens malins:
Le feu estainct, assemblee diabolique
Cherchant les or du d'Amant & Pselin.
1.43 Auant qu'aduienne le changement d'empire,
Il aduiendra vn cas bien merueilleux,
Le champ mue, le pillier de porphire
Mis, translate sus le rocher noilleux
1.44 En bref seront de retour sacrifices,
Coutreuenans seront mys a martyre:
Plus ne seront moines, abbes, ne nouices:
Le miel sera beaucoup plus cher que cire.
1.45 Secteur de secte, grand peine au delateur:
Beste en theatre, dresse le ieu scenique:
Du faict antique ennobly l'inuenteur,
Par sectes monde confus & scismatique.
1.46 Tout aupres d'Aux, de Lestore & Mirande
Grand feu du ciel en trois nuictz tumbera:
Cause aduiendra bien stupende & mirande:
Bien peu apres la terre tremblera.
1.47 Du lac Leman les sermons fascheront:
Des iours seront reduictz par les sepmaines,
Puis moys, puis an, puis tous deffailliront,
Les magistratz damneront leurs loix vaines
1.48 Vingt ans du regne de la Lune passes
Sept mil ans autre tiendra sa monarchie:
Quand le Soleil prendra ses iours lasses
Lors accomplit & mine ma prophetie
1.49 Beaucoup beaucoup auant telles menees
Ceulx d'orient par la vertu lunaire
L'an mil sept cens feront grands emmenees
Subiugant presque le coing Aquilonaire.
1.50 De l'aquatique triplicite naistra
D'vn qui fera le ieudy pour sa feste:
Son bruit, loz, regne, sa puissance croistra,
Par terre & mer aux Oriens tempeste.
1.51 Chef d'Aries, Iupiter & Saturne,
Dieu eternel quelles mutations ?
Puis par long siecle son maling temps retourne,
Gaule, & Itaille quelles esmoutions ?
1.52 Les deux malins de Scorpion conioinct,
Le grand seigneur meurtry dedans sa salle:
Peste a l'eglise par le nouueau roy ioinct,
L'Europe basse & Septentrionale
1.53 Las qu'on verra grand peuple tourmente
Et la Loy saincte en totale ruine
Par autres loix toute Chrestiente,
Quand d'or, d'argent trouue nouuelle mine.
1.54 Deux reuoltz faictz du maling falcigere,
De regne & siecles faict permutation:
Le mobil signe a son endroict si ingere
Aux deux egaux & d'inclination
1.55 Soubz l'opposite climat Babylonique
Grande sera de sang effusion,
Que terre & mer, air, ciel sera inique:
Sectes, faim, regnes, pestes, confusion.
1.56 Vous verres tost & tard faire grands change
Horreurs extremes, & vindications,
Que si la lune conduicte par son ange
Le ciel s'approche des inclinations.
1.57 Par grand discord la trombe tremblera.
Accord rompu dressant la teste au ciel:
Bouche sanglante dans le sang nagera:
Au sol sa face ointe de laict & miel.
1.58 Tranche le ventre,naistra auec deux testes,
Et quatre bras : quelques ans entier viura:
Iour qui Alquilloye celebrera ses festes
Fossen, Turin, chief Ferrare fuyura.
1.59 Les exiles deportes dans les isles
Au changement d'vn plus cruel monarque,
Seront meurtrys: & mis deux les scintilles
Qui de parler ne seront estes parques.
1.60 Vn Empereur naistra pres d'Italie,
Qui a l'Empire sera vendu bien cher,
Diront auec quelz gens ilz se ralie
Qu'on trouuera moins prince que boucher.
1.61 La republique miserable infelice
Sera vastee du nouueau magistrat:
Leur grand amas de l'exil malefice
Fera Sueue rauir leur grand contract.
1.62 La grande perte las que feront les lettres:
Auant le cicle de Latona parfaict,
Feu grand deluge plus par ignares sceptes
Que de long siecle ne se verra refaict.
1.63 Les fleaux passes diminue le monde
Long temps la paix terres inhabitees
Seur marchera par ciel, terre, mer, & onde:
Puis de nouueau les guerres suscitees.
1.64 De nuict soleil penseront auoir veu
Quand le pourceau demy homme on verra,
Bruict, chant, bataille,au ciel battre aperceu
Et bestes brutes a parler lon orra.
1.65 Enfant sans mains iamais veu si grand foudre:
L'enfant royal au ieu d'oesteuf blesse.
Au puy brises fulgures allant mouldre:
Trois soubz les chaines par le millieu trousses:
1.66 Celuy qui lors portera les nouuelles,
Apres vn peu il viendra respirer.
Viuiers, Tournon, Montferrant & Pradelles,
Gresle & tempestes les fera souspirer.
1.67 La grand famine que ie sens approcher,
Souuent tourner, puis estre vniuerselle,
Si grande & longue qu'on viendra arracher
Du bois racine, & l'enfant de mammelle.
1.68 O quel horrible & malheureux tourment
Trois innocens qu'on viendra a liurer.
Poyson suspecte, mal garde tradiment
Mis en horreur par bourreaux enyures.
1.69 La grand montaigne ronde de sept estades,
Apres paix, guerre, faim, inondation,
Roulera loing abismant grans contrades,
Mesmes antiques, & grand fondation.
1.70 Pluie, faim, guerre en Perse non cessee
La foy trop grand trahira le monarque,
Par la finie en Gaule commencee:
Secret augure pour a vn estre parque.
1.71 La tour marine trois fois prise & reprise
Par Hespaignolz, Barbares, Ligurins:
Marseille & Aix, Arles par ceulx de Pise
Vast, feu, fer, pille Auignon des Thurins.
1.72 Du tout Marseille des habitans changee,
Course & poursuitte iusques au pres de Lyon.
Narbon. Tholoze par Bourdeaux oultragee:
Tues captifz presque d'vn million.
1.73 France a cinq pars par neglect assaillie
Tunys, Argel esmeux par Persiens,
Leon, Seuille, Barcelonne faillie
N'aura la classe par les Venitiens.
1.74 Apres seiourne vogueront en Epire:
Le grand secours viendra vers Antioche,
Le noir poil crespe tendra fort a l'Empire:
Barbe d'aerain se roustira en broche.
1.75 Le tyran Sienne occupera Sauone:
Le fort gaigne tiendra classe marine:
Les deux armees par la marque d'Ancone
Par effrayeur le chef s'en examine.
1.76 D'vn nom farouche tel profere sera,
Que les trois seurs auront fato le nom:
Puis grand peuple par langue & faict dira
Plus que nul autre aura bruit & renom.
1.77 Entre deux mers dressera promontoire
Que puis mourra par le mords du cheual:
Le sien Neptune pliera voille noire,
Par Calpre & classe aupres de Rocheual.
1.78 D'vn chef viellard naistra sens hebete,
Degenerant par sauoir & par armes
Le chef de France par sa soeur redoubte:
Champs diuises, concedes aux gensdarmes.
1.79 Bazaz, Lestore, Condon, Ausch, Agine
Esmeus par loix querelle & monopole.
Car Bourd. Toulouze Bay. mettra en ruine
Renouueller voulant leur tauropole.
1.80 De la sixiesme claire splendeur celeste
Viendra tonner si fort en la bourgongne:
Puis naistra monstre de treshideuse beste.
Mars, Apuril, May, Iuin grand charpin & rongne.
1.81 D'humain troupeau neuf seront mis a part
De iugement & conseil separes:
Leur sort sera diuise en depart
kappa Thita Lambda mors, bannis esgares.
1.82 Quand les colomnes de bois grande tremblee
D'Auster conduicte couuerte de rubriche
Tant vuidera dehors grand assemblee,
Trembler Vienne & le pays d'Austriche
1.83 La gent estrange diuisera butins,
Saturne en Mars son regard furieux:
Horrible strage aux Tosquans & Latins,
Grecs, qui seront a frapper curieux.
1.84 Lune obscurcie aux profondes tenebres,
Son frere passe de couleur ferrugine:
Le grand cache long temps soubz les tenebres,
Tiedera fer dans la plaie sanguine.
1.85 Par la responce de dame,roy trouble:
Ambassadeurs mespriseront leur vie:
Le grand ses freres contrefera double
Par deus mourront, ire, haine, enuie
1.86 La grande royne quant se verra vaincu,
Fera exces de masculin couraige:
Sus cheual, fluue passera toute nue,
Suite par fer : a foy fera outrage.
1.87 Ennosigee feu du centre de terre
Fera trembler au tour de cite neufue:
Deux grands rochiers long temps feront la guerre
Puis Arethusa rougira nouueau fleuue.
1.88 Le diuin mal surprenda le grand prince
Vn peu deuant aura femme espouse,
Son puy & credit a vn coup viendra mince,
Conseil mourra pour la teste rasee.
1.89 Tous ceux de Ilerde seront dedans Moselle,
Metans a mort tous ceux de Loyre & Seine:
Secours marin viendra pres d'haulte velle
Quand Hespagnolz ouurira toute veine.
1.90 Bourdeaux, Poitiers, au son de la campane
A grande classe ira iusques a l'Angon,
Contre Gauloys sera leur tramontane,
Quand monstres hydeux naistra pres de Orgon.
1.91 Les dieux feront aux humains apparence,
Ce qu’ilz seront auteurs de grand conflict:
Auant ciel veu serain espee & lance,
Que vers main gauche sera plus grand afflit
1.92 Soubz vn la paix par tout sera clamee,
Mais non long temps pille & rebellion,
Par refus ville, terre & mer entamee,
Mors & captifz le tiers d'vn million
1.93 Terre Italique pres des monts tremblera,
Lyon & coq non trop confederes,
En lieu de peur l'vn l'autre s’aidera
Seul Castulon & Celtes moderes.
1.94 Au port Selin le tyran mys a mort
La liberte non pourtant recouuree:
Le nouueau Mars par vindicte & remort:
Dame par force de frayeur honoree.
1.95 Deuant monstier trouue enfant besson
D'heroic sang de moine & vestutisque:
Son bruit par secte langue & puissance son
Qu'on dira fort eleue le vopisque.
1.96 Celuy qu'aura la charge de destruire
Temples, & sectes, changes par fantasie,
Plus aux rochiers qu'aux viuans viendra nuire
Par langue ornee d'oreilles ressaisies.
1.97 Ce que fer flamme n'a sceu paracheuer,
La doulce langue au conseil viendra faire.
Par repos, songe, le roy fera resuer.
Plus l'ennemy en feu, sang militaire.
1.98 Le chef qu'aura conduit peuple infiny
Loing de son ciel, de meurs & langue estrange:
Cinq mil en Crete & Thessalie finy,
Le chef fuyant sauue en marine grange.
1.99 Le grand monarque que fera compaignie
Auec deux roys vnis par amitie:
O quel souspir fera la grand mesgnie:
Enfants Narbon a l'entour quel pitie.
1.100 Long temps au ciel sera veu gris oiseau
Aupres de Dole & de Touscane terre,
Tenant au bec un verdoyant rameau,
Mourra tost grand, & finera la guerre.
