2.1 VERS Aquitaine par insults Britaniques,
De par eux mesmes grandes incursions.
Pluies,gelees feront terroirs iniques,
Port Selyn fortes fera inuasions.
2.2 La teste blue fera la teste blanche
Autant de mal que France a faiсt leur bien.
Mort a l'anthenne grand pendu sus la branche,
Quand prins des siens le Roy dira combien.
2.3 Pour la chaleur solaire sus la mer
De Negrepont les poissons demis cuits:
Les habitans les viendront entamer
Quand Rod. & Gennes leur faudra le biscuit
2.4 Depuis Monech iusques au pres de Secile
Toute la plage demourra desolee,
Il ny aura fauxbourg, cite,ne ville
Que par Barbares pillee soit & vollee.
2.5 Qu'en dans poisson, fer & lettre enfermee
Hors sortira qui puis fera la guerre,
Aura par mer sa classe bien ramee
Apparoissant pres de latine terre.
2.6 Au pres des portes & dedans deux cites
Seront deux fleaux & onques n'aperceu vn tel,
Faim dedans peste, de fer hors gens boutes,
Crier secours au grand Dieu immortel
2.7 Entre plusieurs aux isles deportes
L'vn estre nay a deux dents en la gorge
Mourront de faim les arbres esbrote
Pour eux neuf roy nouel edict leur forge.
2.8 Temples sacres prime facon Romaine
Reieteront les goffes fondements,
Prenant leurs loix premieres & humaines,
Chassant, non tout, des sainctz les cultements.
2.9 Neuf ans le regne le maigre en paix tiendra,
Puis il cherra en soif si sanguinaire:
Pour luy grand peuple sans foy & loy mourra
Tue par vn beaucoup plus debonnaire.
2.10 Auant long temps le tout sera range
Nous esperons vn siecle bien senestre:
L'estat des masques & des seulz bien change
Peu trouueront qu'a son rang vueille estre.
2.11 Le prochain filz de l'asnier paruiendra
Tant esleue iusques au regne des fors,
Son aspre gloire vn chascun la craindra,
Mais ses enfantz du regne gettes hors.
2.12 Yeulx clos, ouuerts d'antique fantasie
L'habit des seulz seront mys a neant,
Le grand monarque chastiera leur frenaisie:
Rauir des temples le tresor par deuant
2.13 Le corps sans ame plus n'estre en sacrifice.
Iour de la mort mys en natiuite.
L'esprit diuin fera l'ame felice
Voyant le verbe en son eternite.
2.14 A Tours, Gien, garde seront yeulx penetrans
Descouuriront de loing la grand sereine,
Elle & la suitte au port seront entrans
Combat, poulses, puissance souueraine
2.15 Vn peu deuant monarque trucide ?
Castor, Pollux en nef, astre crinite.
L'erain public par terre & mer vuide
Pise, Ast, Ferrare, Turin, terre interdicte.
2.16 Naples, Palerme, Secille, Syracuses
Nouueaux tyrans, fulgures feuz celestes:
Force de Londres, Gand, Brucelles, & Suses
Grand hecatombe, triumphe faire festes.
2.17 Le camp du temple de la vierge vestale,
Non esloigne d'Ethne & monts Pyrenees:
Le grand conduict est cache dens la male
North getes fluues & vignes mastinees
2.18 Nouuelle & pluie subite impetueuse
Empeschera subit deux exercites.
Pierre, ciel, feux faire la mer pierreuse,
La mort de sept terre & marin subites.
2.19 Nouueaux venus, lieu basty sans defence,
Occuper la place par lors inhabitable.
Prez, maisons, champs, villes, prendre a plaisance,
Faim, Peste, guerre, arpen long labourable.
2.20 Freres & seurs en diuers lieux captifz
Se trouueront passer pres du monarque,
Les contempler ses rameaux ententifz,
Desplaisant voir menton, front, nez, les marques
2.21 L'embassadeur enuoye par biremes
A my chemin d'incogneuz repoulses:
De sel renfort viendront quatre triremes,
Cordes & chaines en Negrepont trousses.
2.22 Le camp Asop d'Europe partira,
S'adioignant proche de lisle submergee:
D'Arton classe phalange pliera,
Nombril du monde plus grand voix subrogee
2.23 Palais, oyseaux, par oyseau dechasse,
Bien tost apres le prince preuenu,
Combien qu'hors fleuue ennemis repulse
Dehors saisi trait d'oyseau soustenu.
2.24 Bestes farouches de faim fleuues tranner:
Plus part du camp encontre Hister sera,
En caige de fer le grand fera treisner,
Quand rin enfant Germain obseruer
2.25 La garde estrange trahira forteresse:
Espoir & vmbre de plus hault mariage.
Garde deceue, fort prinse dans la presse,
Loyre, Son Rosne Gar, a mort oultrage
2.26 Pour la faueur que la cite fera
Au grand qui tost perdra camp de bataille,
Fuis le rang Pau, Thesin versera
De sang, feux, mors, noies de coup de taille
2.27 Le diuin verbe sera du ciel frappe,
Qui ne pourra proceder plus auant.
Du reserant le secret estoupe
Qu'on marchera par dessus & deuant
2.28 Le penultiesme du surnom du prophete
Prendra Diane pour son iour & repos:
Loing vaguera par frenetique teste,
Et deliurant vn grand peuple d'impos.
2.29 L'Oriental sortira de son siege,
Passer les monts Apennis, voir la Gaule:
Transpercera ciel les eaux & neige:
Et chascun frappera de sa gaule.
2.30 Vn qui les dieux d'Annibal infernaulx
Fera renaistre, effrayeur des humains
Oncq' plus d'horreurs ne plus pire iournaulx
Qu'auint viendra par Babel aux Romains
2.31 En Campanie Cassilin sera tant
Qu'on ne verra que d'eaux les champs couuerts
Deuant apres la pluye de long temps
Hors mis les arbres rien l'on verra de vert.
2.32 Laict, sang, grenoilles escoudre en Dalmatie,
Conflict donne, peste pres de Balenne:
Cry sera grand par toute esclauonie
Lors naistra monstre pres & dedans Rauenne.
2.33 Par le torrent qui descent de Verone
Par lors qu'au Pau guindera son entree,
Vn grand nauffraige, & non moins en Garonne
Quant ceux de Gennes marcheront leur contree.
2.34 L'ire insensee du combat furieux
Fera a table par freres le fer luire
Les despartir, blesse, curieux:
Le fier duelle viendra en France nuire.
2.35 Dans deux logis de nuict le feu prendra,
Plusieurs dedans estoufes & rostis.
Pres de deux fleuues pour seur il auiendra
Sol, l'Arq, & Caper tous seront amortis.
2.36 Du grand Prophete les lettres seront prinses
Entre les mains du tyrant deuiendront:
Frauder son roy seront les entreprinses,
Mais ses rapines bien tost le troubleront.
2.37 De ce grand nombre que lon enuoyera
Pour secourir dans le fort assieges,
Peste & famine tous les deuorera
Hors mis septante qui seront profliges
2.38 Des condemnes sera fait vn grand nombre
Quand les monarques seront concilies:
Mais l'vn d'eux viendra si malencombre
Que guerres ensemble ne seront ralies.
2.39 Vn an deuant le conflict Italique,
Germains, gaulois, hespaignolz pour le fort:
Cherra l'escolle maison de republicque,
Ou, hors mis peu, seront suffoque mors.
2.40 Vn peu apres non point longue interualle.
Par mer & terre sera faict grand tumulte,
Beaucoup plus grande sera pugne naualle,
Feus, animaux, qui plus feront d'insulte.
2.41 La grand' estoile par sept iours bruslera,
Nuee fera deux soleilz apparoir,
Le gros mastin toute nuict hurlera
Quand grand pontife changera de terroir
2.42 Coq, chiens, & chats de sang seront repeus,
Et de la plaie du tyrant trouue mort,
Au lict d'vn autre iambes & bras rompus,
Qui n'auoit peur mourir de cruel mort.
2.43 Durant l'estoile cheuelue apparente,
Les trois grans princes seront fait ennemis,
Frappes du ciel, paix terre tremulente.
Pau, Timbre vndans, serpent sus le bort mis.
2.44 L'aigle pousee entour des pauillons
Par autres oyseaux d'entour sera chassee,
Quant bruit des cymbres, tubes & sonnaillons
Rendront le sens de la dame insensee.
2.45 Trop le ciel pleure l'Androgyn procree,
Pres de ce ciel sang humain respandu,
Par mort trop tarde grand peuple recree
Tard & tost vient le secours attendu.
2.46 Apres grant trocle humain plus grand s'apreste
Le grand mouteur les siecles renouuelle.
Pluye, sang, laict, famine, fer & peste
Au ciel veu feu, courant longue estincelle.
2.47 L'ennemy grant viel dueil meurt de poison:
Les souuerains par infiniz subiuguez.
Pierres plouuoir, caches soubz la toison:
Par mort articles en vain sont allegues
2.48 La grand copie que passera les montz.
Saturne en l'Arq tournant du poisson Mars
Venins caches soubz testes de saulmons:
Leur chief pendu a fil de polemars.
2.49 Les conseilliers du premier monopole,
Les conquerants seduits par la Melite:
Rodes, Bisance pour leurs exposant pole:
Terre faudra les poursuiuants de fuite.
2.50 Quand ceux d'Hainault,de Gand & de Brucelle
Verront a Langres le siege deuant mis
Derrier leurs flancz seront guerres crueles,
La plaie antique fera pis qu'ennemis.
2.51 Le sang du iuste a Londres fera faulte
Brusles par fouldres de vinttrois les six.
La dame antique cherra de place haute:
De mesme secte plusieurs seront occis
2.52 Dans plusieurs nuits la terre tremblera:
Sur le prins temps deux effors suite:
Corinthe, Ephese aux deux mers nagera:
Guerre s'esmeut par deux vaillans de luite.
2.53 La grande peste de cite maritime
Ne cessera que mort ne soit vengee
Du iuste sang par pris damne sans crime
De la grand dame par feincte n'outraigee.
2.54 Par gent estrange, & de Romains loingtaine
Leur grand cite apres eaue fort troublee,
Fille sans, trop different domaine,
Prins chief, sarreure n'auoir este riblee.
2.55 Dans le conflict le grand qui peu valloit,
A son dernier fera cas merueilleux:
Pendant qu'Hadrie verra ce qu'il failloit,
Dans le banquet pongnale l'orguilleux
2.56 Que peste & glaiue n'a peu seu definer
Mort dans le puys, sommet du ciel frappe.
L'abbe mourra quand verra ruiner
Ceux du naufrage l'escueil volant grapper.
2.57 Auant conflict le grand tombera:
Le grand a mort, mort trop subite & plainte:
Nay imparfaict : la plus part nagera:
Aupres du fleuuie de sang la terre tainte.
2.58 Sans pied ne main dend aygue & forte
Par globe au fort de porc & laine nay:
Pres du portail desloyal se transporte
Silene luit, petit grand emmene.
2.59 Classe Gauloise par apuy de grande garde
Du grand Neptune, & ses tridens souldars
Ronsgee Prouence pour soustenir grand bande:
Plus Mars Narbon. par iauelotz & dards.
2.60 La foy Punicque en Orient rompue
Gang. Iud. & Rosne, Loyre, & Tag changeront
Quand du mulet la faim sera repue,
Classe espargie, sang & corps nageront
2.61 Euge, Tamins, Gironde & la Rochele:
O sang Troien Mort au port de la flesche
Derrier le fleuue au fort mise l'eschele,
Pointes feu grand meurtre sus la bresche.
2.62 Mabus puis tost alors mourra, viendra
De gens & bestes vne horrible defaite,
Puis tout a coup la vengence on verra
Cent, main, soif, faim, quand courra la comete
2.63 Gaulois, Ausone bien peu subiuguera.
Pau, Marne, & Seine fera Perme l'vrie
Qui le grand mur contre eux dressera
Du moindre au mur le grand perdra la vie
2.64 Seicher de faim, de soif gent Geneuoise
Espoir prochain viendra au defaillir,
Sur point tremblant sera loy Gebenoise.
Classe au grand port ne se peult acuillir.
2.65 Le parc enclin grande calamite
Par l'Hesperie & Insubre fera:
Le feu en nef, peste & captiuite:
Mercure en l'Arc Saturne fenera.
2.66 Par grans dangiers le captif echape:
Peu de temps grand la fortune changee.
Dans le palais le peuple est attrape
Par bon augure la cite est assiegee.
2.67 Le blonde au nez forche viendra commettre
Par le duelle & chassera dehors:
Les exiles dedans fera remettre
Aux lieux marins commettant les plus fors.
2.68 De l'aquilon les effors seront grands:
Sus l'Ocean sera la porte ouuerte,
Le regne en lisle sera reintegrand:
Tremblera Londres par voile descouuerte.
2.69 Le roy Gaulois par la Celtique dextre
Voiant discorde de la grand Monarchie,
Sus les trois pars fera fleurir son sceptre,
Contre la cappe de la grand Hirarchie
2.70 Le dard du ciel fera son estendue
Mors en parlant : grande execution.
La pierre en larbre,la fiere gent rendue,
Brut humain monstre, purge expiation.
2.71 Les exiles en Secile viendront
Pour deliurer de faim la gent estrange:
Au point du iour les Celtes luy faudront:
La vie demeure a raison : roy se range.
2.72 Armee Celtique en Italie vexee
De toutes pars conflict & grande perte:
Romains fuis, o Gaule repoulsee.
Pres du Thesin, Rubicon pugne incerte.
2.73 Au lac Fucin de Benac le riuaige
Prins du Leman au port de l'Orguion:
Nay de trois bras predict belliq image,
Par trois couronnes au grand Endymion.
2.74 De Sens, d'Autun viendront iusques au Rosne
Pour passer outre vers les monts Pyrenees:
La gent sortir de la Marque d'Anconne:
Par terre & mer le suiura a grans trainees.
2.75 La voix ouye de l'insolit oyseau,
Sur le canon du respiral estaige,
Si hault viendra du froment le boisseau,
Que l'homme d'homme sera Antropophage
2.76 Foudre en Bourgongne fera cas portenteux,
Que par engin ne pourroit faire
De leur senat sacriste fait boiteux
Fera scauoir aux ennemis l'affaire
2.77 Par arcs feux poix & par feux repousses:
Cris, hurlements sur la minuit ouys.
Dedans sont mis par les ramparts casses
Par cunicules les traditeurs fuis.
2.78 Le grand Neptune du profond de la mer
De gent Punique & sang Gauloys mesle,
Les Isles a sang, pour le tardif ramer:
Plus luy nuira que l'occult mal cele.
2.79 La barbe crespe & noire par engin
Subiuguera la gent cruele & fiere.
Le grand CHYREN ostera du longin
Tous les captifs par Seline baniere.
2.80 Apres conflict du lese l'eloquence
Par peu de temps se tramme faint repos:
Point l'on n’admet les grands a deliurance:
Des ennemis sont remis a propos.
2.81 Par feu du ciel la cite presque aduste:
L'Vrne menasse encor Ceucalion:
Vexee Sardaigne par la Punique fuste
Apres que Libra lairra son Phaeton
2.82 Par faim la proye fera loup prisonnier
L'assaillant lors en extreme detresse.
Le nay aiant au deuant le dernier,
Le grand n'eschappe au millieu de la presse.
2.83 Le gros trafficq du grand Lion change
La plus part tourne en pristine ruine,
Proye aux souldars par pille vendenge
Par Iura mont & Sueue bruine.
2.84 Entre Campaigne, Sienne, Flora, Tustie
Six mois neuf iours ne plourra vne goute.
L'estrange langue en terre Dalmatie
Courira sus : vastant la terre toute.
2.85 Le vieux plain barbe soubs l'estatut seuere,
A Lyon faict dessus l'Aigle Celtique:
Le petit grant trop outre perseuere:
Bruit d'arme au ciel : mer rouge Lygustique
2.86 Naufraige a classe pres d'onde Hadriatique:
La terre tremble esmeue sus l'air en terre mis:
Egypte tremble augment Mahommetique
L'Herault soy rendre a crier est commis
2.87 Apres viendra des extremes contrees
Prince Germain dessus le throsne dore:
La seruitude & eaux rencontrees
La dame serue, son temps plus n'adore.
2.88 Le circuit du grand faict ruineux
Le nom septiesme du cinquiesme sera:
D'vn tiers plus grand l'estrange belliqueux.
Mouton, Lutece, Aix ne garantira.
2.89 Du iour seront demis les deux grandz maistres
Leur grand pouuoir se verra augmente:
La terre neufue sera en ses haultz estres:
Au sanguinaire le nombre racompte.
2.90 Par vie & mort change regne d'Ongrie:
La loy sera plus aspre que seruice,
Leur grand cite d'urlements plaincts & crie:
Castor & Pollux ennemis dans la lyce.
2.91 Soleil leuant vn grand feu lon verra
Bruit & clarte vers Aquilon tendant:
Dedans le rond mort & cris lon orra
Par glaiue, feu, faim, mort las attendants.
2.92 Feu couleur d'or du ciel en terre veu:
Frappe du hault, nay, fait cas merueilleux:
Grand meurtre humain : prins du grand le nepueu,
Morts d'expectacles eschappe l'orguilleux.
2.93 Bien pres du Tymbre presse la lybitine:
Vn peu deuant grand inundation:
Le chef du nef prins, mis a la sentine:
Chasteau,palais en conflagration.
2.94 GRAN Pau, grand mal pour Gauloys receura,
Vaine terreur au maritin Lyon:
Peuple infiny par la mer passera,
Sans eschapper vn quart d'vn milion.
2.95 Les lieux peuples seront inhabitables:
Pour champs auoir grande diuision:
Regnes liures a prudents incapables:
Lors les grands freres mort & dissention.
2.96 Flambeau ardent au ciel soir sera veu
Pres de la fin & principe du Rosne:
Famine, glaiue : tard le secours pourueu,
La Perse tourne enuahir Macedoine.
2.97 Romain Pontife garde de t'approcher
De la cite qui deux fleuues arrouse,
Ton sang viendras au pres de la cracher,
Toy & les tiens quand fleurira la rouse.
2.98 Celuy du sang resperse le visaige
De la victime proche sacrifiee:
Tonant en Leo augure par presaige:
Mis estre a mort lors pour la fiancee.
2.99 Terroir Romain qu'interpretoit augure,
Par gent Gauloyse par trop sera vexee:
Mais nation Celtique craindra l'heure,
Boreas, classe trop loing l'auoir poussee.
2.100 Dedans les isles si horrible tumulte,
Rien on n'orra qu'vne bellique brigue,
Tant grand sera des predateurs l'insulte,
Qu'on se viendra ranger a la grand ligue.
