3.1 APRES combat & bataille nauale,
Le grand neptune a son plus haut beffroy,
Rouge auersaire de peur viendra pasle,
Mettant le grand ocean en effroy.
3.2 Le diuin verbe dourra a la substance
Comprins ciel terre, or occult au faict mystique
Corps, ame, esprit ayant toute puissance,
Tant soubz ses piedz, comme au siege celique.
3.3 Mars & Mercure & l'argent ioint ensemble
Vers le midy extreme siccite:
Au fond d'Asie on dira terre tremble,
Corinthe, Ephese lors en perplexite
3.4 Quand seront proches le default des lunaires,
De l'vn a l'autre ne distant grandement,
Froid, siccite, danger vers les frontieres,
Mesmes ou l'oracle a prins commencement.
3.5 Pres loing defaut de deux grand luminaires
Qui surviendra entre l'Auril & Mars.
O quel cherte mais deux grands debonnaires
Par terre & mer secourront toutes pars.
3.6 Dans temples clos le foudre y entrera.
Les citadins dedans leux fors greues:
Cheuaux, beufs, hommes. l'onde mur touchera,
Par faim, soif soubz les plus foibles armes.
3.7 Les fugitifs, feu du ciel sus les piques:
Conflict prochain des corbeaux s'esbatans,
De terre on crie aide secour celiques,
Quand pres des murs seront les combatans.
3.8 Les Cimbres ioints auecques leurs voisins,
Depopuler viendront presque l'Hespaigne:
Gens amasses Guienne & Limosins
Seront en ligue,& leur feront compaigne.
3.9 Bourdeaux, Rouen & la Rochelle ioins
Tiendront autour la grand mer oceane:
Anglois, Bretons & les Flamans conioints
Les chasseront iusques aupres de Rouane.
3.10 De sang & faim plus grande calamite
Sept fois s'apreste a la marine plage,
Monech de faim, lieu pris, captiuite,
Le grand mene croc en ferree caige.
3.11 Les armes battre au ciel longue saison,
L'arbre au millieu de la cite tombe:
Vermine, rongne, glaiue en face tyson,
Lors le monarque d'Hadrie succombe
3.12 Par la tumeur de Heb. Po, Tag. Timbre & Rome
Et par l'estang Leman & Aretin,
Les deux grans chefs & cites de Garonne
Prins, mors, noyes. Partir humain butin.
3.13 Par fouldre en l'arche or & argent fondu:
Des deux captifz l'vn l'autre mangera:
De la cite le plus grand estendu,
Quand submergee la classe nagera.
3.14 Par le rameau du vaillant personaige
De France infime : par le pere infelice
Honneurs, richesses trauail en son viel aage
Pour auoir creu le conseil d'homme nice.
3.15 Coeur, vigueur, gloire le regne changera
De tous pointz contre ayant son aduersaire.
Lors France enfance par mort subiuguera.
Le grand regent sera lors plus contraire.
3.16 Vn prince Anglois Mars a son coeur de ciel
Vouldra poursuiure sa fortune prospere,
Des deux duelles l'vn percera le fiel:
Hay de luy ,bien ayme de sa mere.
3.17 Mont Auentine brusler nuict sera veu:
Le ciel obscur tout a vn coup en Flandres,
Quand le monarque chassera son nepueu:
Leurs gens d'Eglise commettront les esclandres.
3.18 Apres la pluie laict asses longuete,
En plusieurs lieux de Reims le ciel touche
O quel conflict de sang pres d'eux s'apreste.
Peres & filz roys n'oseront approcher
3.19 En Luques sang & laict viendra plouuoir:
Vn peu deuant changement de preteur,
Grand peste & guerre, faim & soif fera voir
Loing, ou mourra leur prince recteur.
3.20 Par les contrees du grand fleuue Bethique
Loing d'Ibere,au royaume de Grenade,
Croix repoulsees par gens Mahometiques
Vn de Cordube trahira la contrade.
3.21 Au crustamin par mer Hadriatique
Apparoistra vn horrible poisson,
De face humaine,& la fin aquatique,
Qui se prendra dehors de l'amecon.
3.22 Six iours l'assault deuant cite donne:
Liuree sera forte & aspre bataille:
Trois la rendront & a pardonne:
Le reste a feu & sang tranche traille.
3.23 Si France passes oultre mer lygustique,
Tu te verras en isles & mers enclos:
Mahommet contraire : plus mer Hadriatique:
Cheuaux & d'asnes tu rongeras les os.
3.24 De l'entreprinse grande confusion,
Perte de gens, thresor innumerable:
Tu ny dois faire encor tension
France a mon dire fais que sois recordable
3.25 Qui au royaume Navarrois paruiendra
Quand de Secile & Naples seront ioints:
Bigore & Landes par Foyx loron tiendra,
D'vn qui d'Hespaigne sera par trop conioint.
3.26 Des rois & princes dresseront simulacres,
Augures, creuz esleues aruspices:
Corne, victime doree, & d'azur, dacre:
Interpretes seront les extipices.
3.27 Prince libinique puissant en Occident
Francois d'Arabe viendra tant enflammer:
Scauans aux lettres fera condescendent,
La langue Arabe en Francois translater
3.28 De terre foible & pouure parentele,
Par bout & paix paruiendra dans l'empire.
Long temps regner vne ieune femelle,
Qu'oncq en regne n'en suruint vn si pire.
3.29 Les deux nepueus en diuers lieux nourris:
Nauale pugne, terre, peres tumbes
Viendront si hault esleues enguerris
Venger l'iniure, ennemis succombes.
3.30 Celuy qu'en luitte & fer au fait bellique,
Aura porte plus grand que luy le pris,
De nuict au lict six luy feront la pique,
Nud sans harnois subit sera surpris.
3.31 Aux champs de Mede, d'Arabe & d'Armenie,
Deux grans copies trois fois s'assembleront:
Pres du riuaige d'Araxes la mesgnie,
Du grand Soliman en terre tomberont.
3.32 Le grand sepulcre du peuple Aquitanique
S'approchera aupres de la Toscane,
Quand Mars sera pres du coing germanique,
Et au terroir de la gent Mantuane.
3.33 En la cite ou le loup entrera,
Bien pres de la les ennemis seront:
Copie estrange grand pays gastera .
Aux murs & Alpes les amis passeront.
3.34 Quand le deffault du Soleil lors sera,
Sur le plain iour le monstre sera veu:
Tout autrement on l'interpretera.
Cherte n'a garde, nul n’y aura pourueu.
3.35 Du plus profond de l’Occident d’Europe,
De pouures gens vn ieune enfant naistra,
Qui par sa langue seduira grande troupe,
Sont bruit au regne d’Orient plus croistra.
3.36 Enseuely non mort apopletique
Sera trouue auoir les mains mangees:
Quand la cite damnera l'heretique,
Qu'auoit leurs loix se leur sembloit changees.
3.37 Auant l'assault oraison prononcee:
Milan prins d'aigle par embusches deceuz:
Muraille antique par canons enfoncee,
Par feu & sang a mercy peu receuz.
3.38 La gent Gauloise & nation estrange
Oultre les monts,mors prins & profliges:
Au moys contraire & proche de vendange
Par les seigneurs en accord rediges.
3.39 Les sept en trois moys en concorde
Pour subiuguer des alpes Apennines:
Mais la tempeste & Ligure couarde
Les profligent en subites ruynes.
3.40 Le grand theatre se viendra redresser:
Le dez gette & les rets ia tendus.
Trop le premier en glaz viendra lasser,
Par arcz prostrais de long temps ia fendus.
3.41 Bossu sera esleu par le conseil,
Plus hideux monstre en terre n'apperceu.
Le coup volant Prelat creuera l'oeil
Le traistre au roy pour fidelle receu.
3.42 L'enfant naistra a deux dentz en la gorge
Pierres en Tuscie par pluie tomberont:
Peu d'ans apres ne sera bled,ne orge.
Pour saouler ceulx qui de faim failliront.
3.43 Gens d'alentour de Tarn, Loth,& Garonne,
Gardes les monts Apennines passer,
Vostre tombeau pres de Rome & d'Ancone
Le noir poil crespe fera trophee dresser.
3.44 Quand l'animal a l'homme domestique
Apres grans peines & saults viendra parler:
De fouldre a vierge sera si malefique,
De terre Prinse,& suspendue en l'air.
3.45 Les cinq estranges entres dedans le temple,
Leur sang viendra la terre prophaner:
Aux Tholousains sera bien dur exemple
D'vn qui viendra ses loix exterminer.
3,46 Le ciel (de Plancus la cite) nous presaige
Par clers insignes & par estoilles fixes,
Que de son change subit s'aproche l'aage,
Ne pour son bien,ne pour ses malefices.
3.47 Le vieux monarque dechasse de son regne
Aux Orients son secours ira querre:
Pour peur des croix ploiera son enseigne:
En Mitilene ira par port & terre.
3.48 Sept cens captifz estaches rudement
Pour la moitie meurtrir, donne le sort,
Le proche espoir viendra si promptement,
Mais non si tost qu'vne quinziesme mort.
3.49 Regne Gaulois tu seras bien change:
En lieu estrange est translate l'empire
En autres moeurs,& loix seras range:
Rouan, & Chartres te feront bien du pire.
3.50 La republique de la grande cite
A grand rigueur ne vouldra consentir:
Roy sortir hors par trompette cite
L'eschelle au mur, la cite repentir.
3.51 Paris coniure vn grand meurtre commettre,
Bloys le fera sortir en plain effet:
Ceulx d'Orleans vouldront leur chef remettre,
Angiers, Troye, Langres leur feront vn mesfait
3.52 En la Campaigne sera si longue pluie,
Et en la Pouille si grande siccite.
Coq verra l'Aigle,l'aesle mal accomplie:
Par Lyon mise sera en extremite.
3.53 Quand le plus grand emportera le pris
De Nuremberg, d'Auspurg,& ceulx de Basle
Par Agripine chef Frankfort repris
Trauerseront par Flamans iusques en Gale.
3.54 L'vn des plus grans fuira aux Hespaignes,
Qu'en longue plaie apres viendra saigner:
Passant copies par les haultes montaignes
Deuastant tout & puis en paix regner.
3.55 En l'an qu'vn oeil en France regnera,
La court sera a vn bien fascheux trouble:
Le grand de Bloys son amy tuera:
Le regne mis en mal & doubte double.
3.56 Montauban, Nismes, Auignon, & Besier,
Peste,tonnerre & gresle a fin de Mars:
De Paris pont, Lyon mur, Montpellier,
Depuis six cens & sept XXIII.pars.
3.57 Sept fois changer verres gens Britannique
Taintz en sang en deux cens nonante an:
Franche non point par appuy Germanique.
Aries doubte son pole Bastarnan.
3.58 Aupres du Rin des montaignes Noriques
Naistra vn grand de gens trop tart venu,
Qui deffendra Saurome & Pannoniques,
Qu'on ne scaura qu'il sera deuenu.
3.59 Barbare empire par le tiers vsurpe
La plus grand part de son sang mettra a mort:
Par mort senile par luy le quart frappe,
Pour peur que sang, par le sang ne soit mort.
3.60 Par toute Asie grande proscription,
Mesmes en Mysie, Lysie & Pamphylie:
Sang versera par absolution
D'vn ieune noir remply de felonnie.
3.61 La grande bande & secte crucigere
Se dressera en Mesopotamie:
Du proche fleuue compaignie legiere,
Que telle loy tiendra pour ennemie.
3.62 Proche del duero par mer Tyrrene close
Viendra percer les grans monts Pyrenees.
La main plus courte & sa percee gloze,
A Carcassonne conduira ses menees.
3.63 Romain pouuoir sera du tout abas,
Son grand voisin imiter ses vestiges:
Occultes haines ciuiles,& debats
Retarderont aux bouffons leurs folies.
3.64 Le chef de Perse remplira grande Olchade
Classe trireme contre gent Mahometique
De Parthe,& Mede & piller les Cyclades:
Repos long temps au grand port Ionique.
3.65 Quand le sepulchre du grand Romain trouue
Le iour apres sera esleu pontife:
Du senat guieres il ne sera prouue
Empoisonne, son sang au sacre scyphe.
3.66 Le grand baillif d'Orleans mis a mort
Sera par vn de sang vindicatif:
De mort merite ne mourra, ne par sort:
Des piedz & mains mal le faisoit captif.
3.67 Vne nouuelle secte de Philosophes
Mesprisant mort, or, honneurs & richesses,
Des monts Germains ne seront limitrophes:
A les ensuiure auront appuy & presses.
3.68 Peuple sans chef d'Hespaigne & d'Italie
Mors profliges dedans le Cherrenosse:
Leur duict trahy par legiere folie
Le sang nager par tout a la trauerse.
3.69 Grand exercite conduict par iouuenceau,
Se viendra rendre aux mains des ennemis:
Mais le vieillart nay au demy pourceau,
Fera Chalon & Mascon estre amis.
3.70 La grand Bretaigne comprinse l'Angleterre
Viendra par eaux si hault a inonder
La ligue neufue d'Ausonne fera guerre,
Que contre eulx ilz se viendront bender.
3.71 Ceulx dans les isles de long temps assieges
Prendront vigueur force contre ennemis:
Ceulx par dehors mors de faim profliges,
En plus grand faim que iamais seront mis.
3.72 Le bon vieillart tout vif enseuely,
Pres du grand fleuue par faulce souspecon:
Le nouueau vieulx de richesse ennobly
Prins a chemin tout l'or de la rancon.
3.73 Quand dans le regne paruiendra le boiteux
Competiteur aura proche bastard:
Luy & le regne viendront si fort rogneux,
Qu'ains qu'il guerisse son faict sera bien tard.
3.74 Naples, Florence, Fauence & Imole,
Seront en termes de telle fascherie,
Que pour complaire aux malheureux de Nolle,
Plainct d'auoir faict a son chef moquerie.
3.75 Pau, Verone, Vicence, Sarragousse
De glaiues loings terroirs de sang humides:
Peste si grande viendra a la grand gousse
Proche secours,& bien loing les remedes.
3.76 En Germanie naistront diuerses sectes,
S'approchant fort de l'heureux paganisme,
Le coeur captif & petites receptes,
Feront retour a payer le vray disme.
3.77 Le tiers climat soubz Aries comprins
L'an mil sept cens vingt & sept en Octobre,
Le roy de Perse par ceulx d'Egipte prins:
Conflit, mort, perte : a la croix grand oprobre.
3.78 Le chef d'Escosse auec six d'Alemaigne
Par gens de mer Orientaulx captif,
Trauerseront le Calpre & Hespaigne
Present en Perse au nouueau roy craintif.
3.79 L'ordre fatal sempiternel par chaisne
Viendra tourner par ordre consequent:
Du port Phocen sera rompue la chaisne:
La cite prinse, l'ennemy quant & quant.
3.80 Du regne Anglois l'indigne dechasse,
Le conseiller par ire mis a feu:
Ses adherans iront si bas tracer,
Que le bastard sera demy receu.
3.81 Le grand criart sans honte audacieux,
Sera esleu gouuerneur de l'armee:
La hardiesse de son contentieux,
Le pont rompu, cite de peur pasmee
3.82 Freins, Antibol, villes autour de Nice,
Seront vastees fort, par mer & par terre:
Les sauterelles terre & mer vent propice,
Prins, mors, trosses, pilles sans loy de guerre.
3.83 Les longs cheueulx de la Gaule Celtique
Accompaignes d'estranges nations,
Mettront captif la gent Aquitanique,
Pour succomber a internitions.
3.84 La grand cite sera bien desolee
Des habitans vn seul ny demourra:
Mur, sexe, temple, & vierge violee
Par fer, feu, peste, canon peuple mourra.
3.85 La cite prinse par tromperie & fraude,
Par le moyen d'vn beau ieune attrape:
Assault donne Roubine pres de l'AVDE
Luy & tous morts pour auoir bien trompe.
3.86 Vn chef d'Ausonne aux Hespaignes ira,
Par mer fera arrest dedans Marseille,
Auant sa mort vn long temps languira :
Apres sa mort lon verra grand merueille
3.87 Classe Gauloise n'aproches de Corsegue,
Moins de Sardaigne, tu t'en repentiras
Trestous moures frustres de l’aide grogne:
Sang nagera, captif ne me croiras.
3.88 De Barcelonne par mer si grand armee,
Toute Marseille de frayeur tremblera:
Isles saisies de mer ayde fermee,
Ton traditeur en terre nagera.
3.89 En ce temps la sera frustre Cypres
De son secours de ceulx de mer Egee:
Vieux trucides , mais par masles & lyphres
Seduict leur roy, royne plus oultragee.
3.90 Le grand Satyre & Tigre de Hyrcanie,
Don presente a ceulx de l'Ocean:
Vn chef de classe istra de Carmanie
Qui prendra terre au Tyrren Phocean.
3.91 L'arbre qu'estoit par long temps mort seche,
Dans vne nuict viendra a reuerdir:
Cron.roy malade, prince pied estache
Craint d'ennemis fera voile bondir.
3.92 Le monde proche du dernier periode,
Saturne encor tard sera de retour:
Translat empire deuers nation Brodde:
L'oeil arrache a Narbon par Autour.
3.93 Dans Auignon tout le chef de l'empire
Fera arrest pour Paris desole:
Tricast tiendra l'Annibalique ire:
Lyon par change sera mal console.
3.94 De cinq cens ans plus compte l'on tiendra
Celuy qu'estoit l'ornement de son temps:
Puis a vn coup grande clarte donra
Que par ce siecle les rendra trescontens.
3.95 La loy Moricque on verra desfaillir:
Apres vne autre beaucoup plus seductiue,
Boristhenes premier viendra faillir:
Par dons & langue vne plus attractiue
3.96 Chef de Fossan aura gorge copee
Par le ducteur du limier & leurier:
Le faict patre par ceulx du mont Tarpee,
Saturne en Leo XIII. de Feurier.
3.97 Nouuelle loy terre neufue occuper
Vers la Syrie, Iudee,& Palestine:
Le grand empire barbare corruer,
Auant que Phebes son siecle determine.
3.98 Deux royalz freres si fort guerroyeront
Qu'entre eulx sera la guerre si mortelle,
Qu'vn chacun places fortes occuperont:
De regne & vie sera leur grand querelle.
3.99 Aux champs herbeux d'Alein & du Varneigne,
Du mont Lebron proche de la Durance,
Camp de deux parts conflict sera si aigxe:
Mesopotamie desfaillira en la France.
3.100 Entre Gaulois le dernier honnore.
D'homme ennemy sera victorieux:
Force & terroir en moment explore,
D'vn coup de traict quand mourra l'enuieux.
