4.1 CELA du reste de sang non espandu
Venise quiert secours estre donne
Apres auoir bien long temps attendu.
Cite liuree au premier cornet sonne.
4.2 Par mort la France prendra voyage a faire
Classe par mer, marcher monts Pyrenees,
Hespaigne en trouble, marcher gent militaire:
Des plus grand dames en France emmenees.
4.3 D'Arras & Bourges, de Brodes grans enseignes
Vn plus grand nombre de Gascons batre a pied,
Ceulx long du Rosne saigneront les Espaignes:
Proche du mont ou Sagonte s'assied.
4.4 L'impotent prince fache, plainctz & querelles.
De rapts & pilles par coqz & par libyques:
Grand est par terre, par mer infinies voilles,
Seure Italie sera chassant Celtiques.
4.5 Croix, paix, soubs vn accomply diuin verbe,
L'Hespaigne & Gaule seront vnis ensemble.
Grand clade proche, & combat tresacerbe:
Coeur si hardy ne sera qui ne tremble.
4.6 D'habits nouueaux apres faicte la treuue,
Malice tramme & machination:
Premier mourra qui en fera la preuue
Couleur venise insidiation.
4.7 Le mineur filz du grand & hay prince,
De lepre aura a vingt ans grande tache:
De dueil sa mere mourra bien triste & mince.
Et il mourra la ou tombe chet lache.
4.8 La grand cite d'assault prompt & repentin
Surprins de nuict, gardes interrompus
Les excubies & veilles sainct Quintin
Trucides gardes & les pourtails rompus
4.9 Le chef du camp au milieu de la presse
D'vn coup de fleche sera blesse aux cuisses,
Lors que Geneue en larmes & detresse
Sera trahie par Lozan & Souysses.
4.10 Le ieune prince accuse faulsement
Mettra en trouble le camp & en querelles:
Meurtry le chef pour le soustenement:
Sceptre apaiser : puis guerir escroueles.
4.11 Celuy qu'aura gouuert de la grand cappe
Sera induict a quelque cas patrer:
Les douze rouges viendront souiller la nappe
Soubz meurtre, meutre se viendra perpetrer.
4.12 Le camp plus grand de route mis en fuite,
Guaires plus oultre ne sera pourchasse:
Ost recampe, & legion reduicte
Puis hors des Gaules du tout sera chasse.
4.13 De plus grand perte nouuelles raportees,
Le raport fait le camp s'estonnera:
Bandes vnies encontre reuoltees:
Double phalange grand abandonnera.
4.14 La mort subite du premier personnaige
Aura change & mis vn autre au regne:
Tost, tard venu a si haut & bas aage,
Que terre & mer faudra que on le craigne
4.15 D'ou pensera faire venir famine,
De la viendra le ressasiement:
L'oeil de la mer par auare canine
Pour de l'vn l'autre donrra huyle, froment.
4.16 La cite franche de liberte fait serue:
Des profliges & resueurs faict asyle.
Le roy change a eulx non si proterue:
De cent seront deuenus plus de mille.
4.17 Changer a Beaune, Nuy, Chalons & Diion
Le duc voulant amander la Barree
Marchant pres fleuue, poisson, bec de plongeon,
Verra la queue : porte sera serree.
4.18 Des plus letres dessus les faits celestes
Seront par princes ignorants reproues:
Punis d'Edit, chasses, comme scelestes,
Et mis a mort la ou seront trouues.
4.19 Deuant Rouan d'Insubres mis le siege,
Par terre & mer enfermes les passages.
D'Haynault, & Flandres, de Gand & ceux de Liege
Par dons laenees rauiront les riuages.
4.20 Paix vberte long temps lieu louera
Par tout son regne desert la fleur de lys:
Corps morts d'eau, terre la lon aportera,
Sperants vain heur d'estre la enseuelis
4.21 Le changement sera fort difficile:
Cite, prouince au change gain fera:
Cueur haut, prudent mis, chasse luy habile.
Mer, terre, peuple son estat changera.
4.22 La grand copie qui sera deschassee,
Dans vn moment fera besoing au roy:
La foy promise de loing sera faulcee
Nud se verra en piteux desarroy.
4.23 La legion dans la marine classe
Calcine, Magnes soulphre,& poix bruslera:
Le long repos de lasseuree place:
Port Selyn, Hercle feu les consumera.
4.24 Ouy soubs terre saincte d'ame,voix fainte,
Humaine flamme pour diuyne voir luire,
Fera des seulz de leur sang terre tainte
Et les saints temples pour les impurs destruire.
4.25 Corps sublimes sans fin a l'oeil visibles
Obnubiler viendront par ces raisons:
Corps, front comprins,sens chief & inuisibles,
Diminuant les sacrees oraisons
4.26 Lou grand eyssame se leuera d'abelhos,
Que non sauran don te siegen venguddos
Denuech l'enbousque, lou gach dessous las treilhos
Ciutad trahido per cinq lengos non nudos.
4.27 Salon, Mansol, Tarascon de SEX. l'arc,
Ou est debout encor la piramide,
Viendront liurer le prince Dannemarc
Rachat honny au temple d'Artemide.
4.28 Lors que Venus du Sol sera couuert,
Soubz l'esplendeur sera forme occulte,
Mercure au feu les aura descouuert
Par bruit bellique sera mis a l'insulte.
4.29 Le Sol cache eclipse par Mercure
Ne sera mis que pour le ciel second.
De Vulcan Hermes sera faicte pasture:
Sol sera veu pur rutilant & blond
4.30 Plus vnze fois Luna Sol ne vouldra,
Tous augmentes & baisses de degre:
Et si bas mis que peu or on coudra:
Qu'apres faim, peste descouuert le secret.
4.31 La Lune au plain de nuict sur le hault mont,
Le nouueau sophe d'vn seul cerueau la veu:
Par ses disciples estre immortel semond
Yeulx au midy. en seins mains, corps au feu.
4.32 Es lieux & temps chair au poisson donra lieu:
La loy commune sera faicte au contraire:
Vieulx tiendra fort puis oste du millieu
Le Panta choina philon mis fort arriere.
4.33 Iupiter ioinct plus Venus qu'a la Lune
Apparoissant de plenitude blanche:
Venus cachee soubz la blancheur Neptune,
De Mars frappee par la granee branche
4.34 Le grand mene captif d'estrange terre,
D'or enchaine au roy CHYREN offert,
Qui dans Ausone, Milan perdra la guerre,
Et tout son ost mis a feu & a fer.
4.35 Le feu estaint, les vierges trahiront
La plus grand part de la bende nouuelle:
Fouldre a fer, lance les seulz roy garderont:
Etrusque & Corse, de nuict gorge allumelle.
4.36 Les ieux nouueaux en Gaule redresses,
Apres victoire de l'Insubre champaigne:
Monts d'Esperie, les grands lies, trousses:
De peur trembler la Romaigne & l'Espaigne
4.37 Gaulois par saults, monts viendra penetrer:
Occupera le grand lieu de l'Insubre:
Au plus profond son ost fera entrer:
Gennes, Monech pousseront classe rubre.
4.38 Pendant que duc, roy, royne occupera
Chef Bizant du captif en Samothrace:
Auant l'assault l'vn l'autre mangera:
Rebours ferre suyura du sang la trasse.
4.39 Les Rodiens demanderont secours
Par le neglet de ses hoyrs delaissee.
L'empire Arabe reualera son cours
Par Hesperies la cause redressee.
4.40 Les forteresses des assieges serres
Par poudre a feu profondes en abysme:
Les proditeurs seront touts vifs serres
Onc aux sacristes n'auint si piteux scisme.
4.41 Gymnique sexe captiue par hostaige
Viendra de nuit custodes deceuoyr:
Le chef du camp deceu par son langaige
Lairra a la gente, fera piteux a voyr
4.42 Geneue & Langres par ceux de Chatres & Dolle
Et par Grenoble captif au Montlimard
Seysset, Losanne par fraudulente dole,
Les trahiront par or soyxante marc.
4.43 Seront oys au ciel les armes battre,
Celuy an mesme les diuins ennemis:
Voudront loix sainctes iniustement debatre:
Par foudre & guerre bien croyans a mort mis.
4.44 Deux gros de Mende ,de Roudes & Milhau
Cahours, Limoges, Castres malo,sepmano
De nuech l'intrado, de Bourdeaux vncailhau
Par Perigort au toc de la campano.
4.45 Par conflit roy, regne abandonnera:
Le plus grand chef faillira au besoing:
Mors profliges peu en rechapera,
Tous destranches, vn en sera tesmoing.
4.46 Bien defendu le faict par excelence,
Garde toy Tours de ta proche ruine.
Londres & Nantes par Reims fera defense
Ne passes outre au temps de la bruine.
4.47 Le noir farouche quand aura essaye
Sa main sanguine par feu, fer, arcs tendus:
Trestout le peuple sera tant effraie:
Voyr les plus grans par col & pieds pendus.
4.48 Planure Ausonne fertile, spacieuse
Produira taons si tant sauterelles:
Clarte solaire deuiendra nubileuse,
Ronger le tout, grand peste venir d'elles.
4.49 Deuant le peuple sang sera respandu
Que du hault ciel ne viendra esloigner:
Mais d'vn long temps ne sera entendu
L'esprit d'vn seul le viendra tesmoigner.
4.50 Libra verra regner les Hesperies,
De ciel,& terre tenir la monarchie:
D'Asie forces nul ne verra peries
Que sept ne tiennent par ranc la hierarchie.
4.51 Vn duc cupide son ennemy ensuyure
Dans entrera empeschant la phalange:
Hastez a pied si pres viendront poursuiure,
Que la iournee conflite pres de Gange.
4.52 En cite obsesse aux murs hommes & femmes
Ennemis hors le chef prestz a soy rendre
Vent sera fort encontre les gensdarmes:
Chasses seront par chaux, poussiere & cendre.
4.53 Les fugitifz & bannis reuoquez:
Peres & filz grand garnisant les haultz puits:
Le cruel pere & les siens suffoquez:
Son filz plus pire submerge dans le puits.
4.54 Du nom qui onques ne fut au roy Gaulois
Iamais ne fut vn fouldre si craintif.
Tremblant l'Italie, l'Espaigne & les Anglois,
De femme estrangiers grandement attentif.
4.55 Quant la corneille sur tour de brique ioincte,
Durant sept heures ne fera que crier:
Mort presagee de sang statue taincte,
Tyran meurtri, aux Dieux peuple prier.
4.56 Apres victoire de rabieuse langue,
L'esprit tempte en tranquil & repos:
Victeur sanguin par conflict faict harangue,
Roustir la langue & la chair & les os.
4.57 Ignare enuie du grand Roy supportee,
Tiendra propos deffendre les escriptz.
Sa femme non femme par vn autre tentee,
Plus double deux ne fort ne criz
4.58 Soleil ardant dans le gosier coller,
De sang humain arrouser terre Etrusque:
Chef seille d'eaue, mener son filz filer,
Captiue dame conduicte en terre turque.
4.59 Deux assieges en ardante ferueur:
De soif estainctz pour deux plaines tasses
Le fort lime', & vn viellart resueur,
Aux Geneuois de Nira monstra trasse.
4.60 Les sept enfans en hostaige laisses,
Le tiers viendra son enfant trucider:
Deux par son filz seront d'estoc perces.
Gennes, Florence lors viendra encunder.
4.61 Le vieulx mocque' & priue' de sa place,
Par l'estrangier qui le subornera:
Mains de son filz mangees deuant sa face,
Le frere a Chartres, Orl. Rouan trahyra.
4.62 Vn coronnel machine ambition,
Se saisira de la plus grande armee,
Contre son prince faincte inuention,
Et descouuert sera soubz la ramee
4.63 L'armee Celtique contre les montaignars,
Qui seront sceuz & prins a la lipee:
Paysants fresz poulseront tost faugnars,
Precipitez tous au fil de l'espee.
4.64 Le deffaillant en habit de bourgois,
Viendra le Roy tempter de son offence:
Quinze souldartz la pluspart Vstagois,
Vie derniere & chef de sa cheuance.
4.65 Au deserteur de la grand forteresse,
Apres qu'aura son lieu abandonne',
Son aduersaire fera si grand prouesse,
L'Empereur tost mort sera condemne'
4.66 Soubz couleur faincte de sept testes rasees,
Seront semes diuers explorateurs:
Puys & fontaines de poyson arrousees,
Au fort de Gennes humains deuorateurs.
4.67 L’an que Saturne & Mars esgaulx combust,
L'air fort seiche,' longue traiection:
Par feux secretz, d'ardeur grand lieu adust,
Peu pluye, vent chault, guerres, incursions.
4.68 En l’an bien proche non esloigne' de Venus.
Les deux plus grans de l'Asie & d'Affrique,
Du Ryn & hister qu'on dira sont venus,
Crys, pleurs a Malte & coste' ligustique.
4.69 La cite' grande les exiles tiendront,
Les citadins mors, meurtris & chasses:
Ceulx d'Aquilee a Parme promettront,
Monstrer l'entree par les lieux non trasses.
4.70 Bien contigue des grans monts Pyrenees,
Vn contre l'aigle grand copie adresser:
Ouuertes veines, forces exterminees,
Que iusque a Pau le chef viendra chasser.
4.71 En lieu d'espouse les filles trucidees,
Meurtre a grand faulte ne sera superstile:
Dedans le puys vestules inondees,
L'espouse estaincte par hauste d'Aconile.
4.72 Les Artomiques par Agen & l'Estore,
A sainct Felix feront leur parlement:
Ceulx de Basas viendront a la mal' heure,
Saisir Condon & Marsan promptement
4.73 Le nepueu grand par forces prouuera
Le pache faict du coeur pusillanime:
Ferrare & Ast le Duc esprouuera,
Par lors qu'au soir sera le pantomime
4.74 Du lac lyman & ceulx de Brannonices:
Tous assemblez contre ceulx d'Aquitaine:
Germains beaucop encor plus Souisses,
Seront desfaictz auec ceulx d'Humaine.
4.75 Prest a combatre fera defection,
Chef aduersaire obtiendra la victoire:
Larrieregarde fera defension.
Les desfaillans mort au blanc territoire.
4.76 Les Nictobriges par ceulx de Perigort,
Seront vexez tenant iusques au Rosne:
Lassotie de Gascons & Begorn,
Trahir le temple, le prebstre estant au prosne:
4.77 SELIN monarque l'Italie pacifique,
Regnes vnis Roy chrestien du monde:
Mourant vouldra coucher en terre blesique,
Apres pyrates auoir chasse' de l'onde.
4.78 La grand armee de la pugne ciuille,
Pour de nuict Parme a l'estrange trouuee,
Septanteneuf meurtris dedans la ville,
Les estrangiers passez tous a l'espee.
4.79 Sang Royal fuis Monhurt, Mas, Eguillon,
Remplis seront de Bourdelois les landes,
Nauarre, Bygorre, poinctes & eguillons,
Profondz de faim vorer de liege glandes.
4.80 Pres du grand fleuue grand fosse terre egeste,
En quinze pars sera l'eau diuisee:
La cite' prinse, feu, sang, crys, conflict mettre.
Et la plus part concerne au collisee.
4.81 Pont on fera promptement de nacelles,
Passer l'armee du grand prince Belgique:
Dans profondres & non loing de Brucelles,
Oultre passes detrenches sept a picque.
4.82 Amas s'approche venant d'Esclauonie,
L'Olestant vieulx cite' ruynera:
Fort desolee verra sa Romanie,
Puis la grand flamme estaindre ne scaura.
4.83 Combat nocturne le vaillant capitaine,
Vaincu fuyra, peu de gens proflige':
Son peuple esmeu, sedition non vaine.
Son propre filz le tiendra assiege'.
4.84 Vn grand d'Auserre mourra bien miserable.
Chasse' de ceulx qui soubz luy ont este':
Serre' de chaisnes, apres d'vn rude cable,
En l'an que Mars, Venus & Sol mis en este'
4.85 Le charbon blanc du noir sera chasse',
Prisonnier faict mene' au tombereau,
More Chameau sus piedz entrelassez,
Lors le puisne' sillera l'aubereau.
4.86 L'an que Saturne en eaue sera conioinct,
Auecques Sol, le Roy fort & puissant,
A Reims & Aix sera receu & oingt,
Apres conquestes meurtrira innocens.
4.87 Vn filz du Roy tant de langues aprins,
A son aisne' au regne different:
Son pere beau au plus grand filz comprins,
Fera perir principal adherant.
4.88 Le grand Antoine du nom de faict sordide
De Phthyriase a son dernier ronge':
Vn qui de plomb vouldra estre cupide,
Passant le port d'esleu sera plonge'.
4.89 Trente de Londres secret coniureront,
Contre leur Roy sur le pont l'entreprise:
Luy, satalites la mort degousteront,
Vn Roy esleu blonde, natif de Frize.
4.90 Les deux copies aux murs ne pourront ioindre,
Dans cest instant trembler Milan, Ticin:
Faim, soif, doubtance si fort les viendra poindre
Chair, pain, ne viures n'auront vn seul boncin.
4.91 Au duc Gaulois contrainct battre au duelle,
La nef Mellele monech n'aprochera,
Tort accuse', prison perpetuelle,
Son filz regner auant mort taschera.
4.92 Teste tranchee du vaillant capitaine,
Sera gettee deuant son aduersaire:
Son corps pendu de sa classe a l'antenne
Confus fuira par rames a vent contraire.
4.93 Vn serpent veu proche du lict royal,
Sera par dame nuict chiens n'abayeront:
Lors naistre en France vn prince tant royal,
Du ciel venu tous les princes verront.
4.94 Deux grans freres seront chasses d'Espaigne,
L'aisne vaincu soubz les monts Pyrenees:
Rougir mer, rosne, sang leman d'Alemaigne,
Narbon. Blyterre, d'Agath. contaminees.
4.95 Le regne a deux laisse' bien peu tiendront,
Trois ans sept moys passes feront la guerre
Les deux vestales contre rebeleront,
Victor puis nay en Armonique terre
4.96 La soeur aisnee de l'isle Britannique
Quinz ans deuant le frere aura naissance,
Par son promis moyennant verrifique,
Succedera au regne de balance.
4.97 L'an que Mercure, Mars, Venus retrograde,
Du grand Monarque la ligne ne faillir:
Esleu du peuple l'vsitant pres de Gagdole.
Qu'en paix & regne viendra fort enuieillir.
4.98 Les Albanois passeront dedans Rome,
Moyennant Langres demiples affubles.
Marquis & Duc ne pardonner a homme,
Feu, sang, morbilles point d'eau, faillir les bledz.
4.99 L’aisne' vaillant de la fille du Roy,
Repoulsera si profond les Celtiques,
Qu'il mettra fouldres, combien en tel arroy
Peu & loing, puis profond es Hesperiques
4.100 De feu celeste au Royal edifice.
Quant la lumiere de Mars desfaillira,
Sept moys grand guerre, mort gent de malefice
Rouen, Eureux au Roy ne faillira.
