5.1 AVant venue de ruine Celtique,
Dedans le temple deux parlamenteront
Poignard cueur, d'vn monte au coursier & picque,
Sans faire bruit le grand enterreront
5.2 Sept coniures au banquet feront luyre,
Contre les trois le fer, hors de nauire
L'vn les deux classes au grand fera conduire,
Quant par le mail. Denier au front luy tire.
5.3 Le successeur de la duche viendra.
Beaucoup plus oultre que la mer de Tosquane
Gauloise branche la Florence tiendra,
Dans son giron d'accord nautique Rane.
5.4 Le gros mastin de cite' deschasse',
Sera fasche' de l'estrange alliance,
Apres aux champs auoir le cerf chasse'
Le loup & l'Ours se donront deffiance.
5.5 Soubz vmbre faincte d'oster de seruitude,
Peuple & cite' l'vsurpera luy mesmes
Pire fera par fraulx de ieune pute,
Liure' au champ lisant le faulx proesme.
5.6 Au roy l'Augur sur le chef la main mettre,
Viendra prier pour la paix Italique:
A la main gauche viendra changer le sceptre,
De Roy viendra Empereur pacifique.
5.7 Du Triumuir seront trouuez les os,
Cherchant profond thresor aenigmatique.
Ceulx d'alentour ne seront en repos.
De concauer marbre & plomb metalique.
5.8 Sera laisse' le feu vif, mort cache',
Dedans les globes horrible espouuentable.
De nuict a classe cite' en poudre lasche',
La cite' a feu, l'ennemy fauorable.
5.9 Iusques aux fondz la grand arq demolue,
Par chef captif l'amy anticipe',
Naistra de dame front face cheuelue,
Lors par astuce duc a mort attrape'.
5.10 Vn chef Celtique dans le conflict blesse',
Aupres de caue voyant siens mort abatre:
De sang & playes & d'ennemis presse',
Et secours par incognuz de quatre.
5.11 Mer par Solaires seure ne passera,
Ceulx de Venus tiendront toute l'Affrique:
Leur regne plus Sol, Saturne n'occupera,
Et changera la part Asiatique.
5.12 Aupres du lac Leman sera conduite,
Par garse estrange cite' voulant trahir:
Auant son meurtre a Auspurg la grand suitte,
Et ceulx du Ryn la viendront inuahir.
5.13 Par grand fureur le roy Romain Belgique
Vexer vouldra par phalange barbare:
Fureur grinsseant chassera gent lybique
Despuis Pannons iusques Hercules la hare.
5.14 Saturne & Mars en leo Espaigne captiue,
Par chef lybique au conflict attrape',
Proche de Malthe, Heredde prinse viue,
Et Romain sceptre sera par coq frappe'.
5.15 En nauigant captif prins grand pontife,
Grans apretz faillir les clercz tumultuez:
Second esleu absent son bien debife,
Son fauory bastard a mort tue'.
5.16 A son hault pris plus la lerme sabee,
D'humaine chair par mort en cendre mettre,
A l'isle Pharos par croisars perturbee,
Alors qu'a Rodes paroistra dur espectre.
5.17 De nuict passant le roy pres d'vne Andronne,
Celuy de Cipres & principal guette.
Le roy failli, la main fuict long du Rosne,
Les coniures l'iront a mort mettre.
5.18 De dueil mourra l'infelix proflige',
Celebrera son vitrix l'heccatombe:
Pristine loy, franc edit redige',
Le mur & Prince au septiesme iour tombe.
5.19 Le grand Royal d'or, d'aerain augmente',
Rompu la pache, par ieune ouuerte guerre:
Peuple afflige' par vn chef lamente',
De sang barbare sera couuerte terre.
5.20 Dela les Alpes grand armee passera,
Vn peu deuant naistra monstre vapin:
Prodigieux & subit tornera
Le grand Tosquan a son lieu plus propin.
5.21 Par le trespas du monarque latin,
Ceulx qu'il aura par regne secouruz:
Le feu luyra, diuise' le butin.
La mort publique aux hardis incoruz.
5.22 Auant qu'a Rome grand aye rendu l'ame
Effrayeur grande a l'armee estrangiere
Par Esquadrons, l'embusche pres de Parme,
Puis les deux roges ensemble feront chere.
5.23 Les deux contents seront vnis ensemble,
Quant la pluspart a Mars seront conioinct:
Le grand d'Affrique en effraieur & tremble,
DVVMVIRAT par la classe desioinct.
5.24 Le regne & loy soubz Venus esleue',
Saturne aura sus Iupiter empire
La loy & regne par le Soleil leue',
Par Saturnins endurera le pire.
5.25 Le prince Arabe Mars, Sol, Venus, Lyon
Regne d'Eglise par mer succombera:
Deuers la Perse bien pres d'vn million,
Bisance, Egipte, ver. serp. inuadera.
5.26 La gent esclaue par vn heur martial,
Viendra en hault degre' tant esleuee,
Changeront prince, naistre vn prouincial,
Passer la mer copie aux monts leuee.
5.27 Par feu & armes non loing de la marnegro,
Viendra de Perse occuper Trebisonde:
Trembler Pharos Methelin, Sol alegro,
De sang Arabe d'Adrie couuert vnde.
5.28 Le bras pendu & la iambe liee,
Visaige pasle, au seing poignard cache',
Trois qui seront iures de la meslee
Au grand de Gennes sera le fert lasche.
5.29 La liberte' ne sera recouuree,
L'occupera noir fier, vilain inique,
Quant la matiere du pont sera ouuree,
D'Hister, Venise faschee la republique.
5.30 Tout a l'entour de la grande cite',
Seront soldartz loges par champs & ville.
Donner l'assault Paris, Rome incite'
Sur le pont lors sera faicte, grand pille
5.31 Par terre Attique chef de la sapience,
Qui de present est la rose du monde:
Pont ruyne', & sa grand preeminence
Sera subditte & naufrage des vndes.
5.32 Ou tout bon est, tout bien Soleil & lune
Est abondant, sa ruyne s'approche.
Du ciel s'aduance vaner ta fortune,
En mesme estat que la septiesme roche.
5.33 Des principaulx de cite' rebellee
Qui tiendront fort pour liberte' rauoir.
Detrencher masles, infelice meslee,
Crys, vrlemens a Nantes piteux voir.
5.34 Du plus profond de l'occident Anglois
Ou est le chef de l'isle britannique
Entrera classe dans Gyronde, par Blois
Par vin & sel, feuz cachez aux barriques.
5.35 Par cite' franche de la grand mer Seline
Qui porte encores a l'estomach la pierre,
Angloise classe viendra soubz la bruine
Vn rameau prendre, du grand ouuerte guerre.
5.36 De soeur le frere par simulte faintise
Viendra mesler rosee en myneral:
Sur la placente donne a vieille tardifue,
Meurt le goustant sera simple & rural.
5.37 Trois cents seront d'vn vouloir & accord,
Que pour venir au bout de leur attainte,
Vingtz moys apres tous & recordz
Leur roy trahir simulant haisne faincte.
5.38 Ce grand monarque qu'au mort succedera,
Donnera vie illicite & lubrique,
Par nonchalance a tous concedera,
Qu'a la parfin fauldra la loy Salique.
5.39 Du vray rameau de fleur de lys issu
Mis & loge' heritier d'Hetrurie:
Son sang antique de longue main tissu,
Fera Florence florir en l'armoirie.
5.40 Le sang royal sera si tresmesle',
Contraint seront Gaulois de l'Hesperie:
On attendra que terme soit coule',
Et que memoire de la voix soit perie.
5.41 Nay soubz les vmbres & iournee nocturne,
Sera en regne & bonte' souueraine:
Fera renaistre son sang de l'antique vrne,
Renouuelant siecle d'or pour l'aerain.
5.42 Mars esleue' en son plus hault beffroy,
Fera retraire les Allobrox de France:
La gent Lombarde fera si grand effroy,
A ceux de l'Aigle comprins soubz la balance.
5.43 La grand' ruyne des sacres ne s'esloigne,
Prouence, Naples, Sicille, seez & Ponce,
En Germanie, au Ryn & la Cologne,
Vexes a mort par tous ceulx de Magonce.
5.44 Par mer le rouge sera prins des pyrates,
La paix sera par son moyen troublee:
L'ire & l'auare commettra par fainct acte,
Au grand Pontife sera l'armee doublee.
5.45 Le grand Empire sera tost desolle'
Et translate' pres d'arduenne silue:
Les deux bastardz par l'aisne' decolle',
Et regnera Aenobarb, nez de milue.
5.46 Par chapeaux rouges querelles & nouueaux scismes
Quant on aura esleu le Sabinois:
On produira contre luy grans sophismes,
Et sera Rome lesee par Albanois.
5.47 Le grand, Arabe marchera bien auant,
Trahy sera par les Bisantinois:
L'antique Rodes luy viendra au deuant,
Et plus grand mal par austre Pannonois.
5.48 Apres la grande affliction du sceptre,
Deux ennemis par eulx seront desfaictz:
Classe d’Affrique aux Pannons viendra naistre,
Par mer & terre seront horribles faictz.
5.49 Nul de l'Espaigne, mais de l'antique France
Ne sera esleu pour le tremblant nacelle
A l'ennemy sera faicte fiance,
Qui dans son regne sera peste cruelle.
5.50 L'an que les freres du lys seront en aage,
L'vn d'eulx tiendra la grande Romanie:
Trembler les monts, ouuert latin passaige,
Pache macher contre fort d'Armenie.
5.51 La gent de Dace, d'Angleterre & Polonne
Et de Bohesme feront nouuelle ligue.
Pour passer oultre d'Hercules la colonne,
Barcins, Tyrrens dresser cruelle brigue.
5.52 Vn Roy sera qui donra l'opposite.
Les exilez esleuez sur le regne:
De sang nager la gent caste hyppolite,
Et florira long temps soubz telle enseigne.
5.53 La loy du Sol & Venus contendens
Appropriant l'esprit de prophetie:
Ne l'vn, ne l'autre ne seront entendens,
Par Sol tiendra la loy du grand Messie.
5.54 Du pont Euxine, & la grand Tartarie,
Vn roy sera qui viendra voir la Gaule,
Transpercera Alane & l'Armenie,
Et dans Bisance lairra sanglante Gaule
5.55 De la felice Arabie contrade,
Naistra puissant de loy Mahometique:
Vexer l'Espaigne, conquester la Grenade,
Et plus par mer a la gent lygustique.
5.56 Par le trespas du tresuieillart pontife
Sera esleu Romain de bon aage,
Qu’il sera dict que le siege debiffe,
Et long tiendra & de picquant ouuraige.
5.57 Istra du mont Gaulfier & Auentin,
Qui par le trou aduertira l'armee
Entre deux rocz sera prins le butin,
De SEXT, mansol faillir la renommee.
5.58 De laqueduct d'Vticense, Gardoing,
Par la forest & mont Inaccessible,
En my du pont sera tasche' au poing
Le chef Nemans qui tant sera terrible.
5.59 Au chef Anglois a Nymes trop seiour,
Deuers l'Espaigne au secours Aenobarbe
Plusieurs mourront par Mars ouuert ce iour,
Quant en Artoys faillir estoille en barbe.
5.60 Par teste rase viendra bien mal eslire,
Plus que sa charge ne porte passera.
Si grand fureur & raige fera dire,
Qu'a feu & sang tout sexe trenchera.
5.61 L'enfant du grand n'estant a sa naissance,
Subiuguera les haultz monts Apennis:
Fera trembler tous ceulx de la balance,
Et des monts feux iusques a mont Senis.
5.62 Sur les rochers sang on verra plouuoir,
Sol Orient, Saturne Occidental:
Pres d'Orgon guerre a Rome grand mal voir,
Nefz parfondrees, & prins le Tridental.
5.63 De vaine emprise l'honneur indue plaincte,
Gallotz errans par latins froit, faim, vagues
Non loing du Tymbre de sang la terre taincte,
Et sur humains seront diuerses plagues.
5.64 Les assembles par repoz du grand nombre
Par terre & mer conseil contremande':
Pres de l'Automne Gennes, Nice de l'ombre
Par champs & villes le chef contrebande'.
5.65 Subit venu l'effrayeur sera grande,
Des principaulx de l'affaire caches:
Et dame en braise plus ne sera en veue,
De peu a peu seront les grans faschez.
5.66 Soubz les antiques edifices vestaulx,
Non esloignez d'aqueduct ruyne.
De Sol & Luna sont les luysans metaulx,
Ardante lampe Traian d'or burine
5.67 Quant chef Perouse n'osera sa tunique
Sens au couuert tout nud s'expolier:
Seront prins sept faict Aristocratique,
Le pere & filz mors par poincte au colier.
5.68 Dans le Dannube & du Rin viendra boire
Le grand Chameau, ne s'en repentira:
Trembler du Rosne & plus fort ceulx de loire
Et pres des Alpes coq le ruinera.
5.69 Plus ne sera le grand en faulx sommeil,
L'inquietude viendra prendre repoz:
Dresser phalange d'or, azur & vermeil
Subiuguer Affrique la ronger iusques aux oz
5.70 Des regions subiectes a la Balance
Feront troubler les monts par grande guerre,
Captifz tout sexe deu & tout bisance,
Qu'on criera a l'aulbe terre a terre.
5.71 Par la fureur d'vn qui attendra l'eau,
Par la grand raige tout l'exercite esmeu:
Charge' des nobles a dixsept bateulx,
Au long du Rosne tard messagier venu.
5.72 Pour le plaisir d'edict voluptueux,
On meslera la poyson dans l’aloy,:
Venus sera en cours si vertueux,
Qu'obfusquera du Soleil tout aloy.
5.73 Persecutee sera de Dieu l'Eglise
Et les sainctz temples seront expoliez,
L'enfant la mere mettra nud en chemise,
Seront Arabes aux Polons raliez.
5.74 De sang Troyen naistra coeur, Germanique
Qu’il deuiendra en si haulte puissance:
Hors chassera gent estrange Arabique,
Tournant l'eglise en pristine preeminence
5.75 Montera hault sur le bien plus a dextre,
Demourra assis sur la pierre quarree,
Vers le midy pose' a la senestre,
Baston tortu en main, bouche serree.
5.76 En lieu libere tendra son pauillon,
Et ne vouldra en cites prendre place
Aix, Carpen l'isle volce, mont, Cauaillon,
Par tous ses lieux abolira sa trasse.
5.77 Tous les degrez d'honneur ecclesiastique
Seront changez en dial. quirinal:
En Martial quirinal flaminique,
Puis vn Roy de France le rendre vulcanal.
5.78 Les deux vniz ne tiendront longuement,
Et dans treze ans au Barbare satrappe,
Aux deux costez feront tel perdement,
Qu'on benyra le Barque & sa cappe.
5.79 La sacree pompe viendra baisser les aisles,
Par la venue du grand legislateur:
Humble haulsera vexera les rebelles,
Naistra sur terre aucun aemulateur.
5.80 Logmion grand bisance aprouchera.
Chasse sera la barbarique ligne:
Des deux loix l'vne l'estinique lachera,
Barbare & franche en perpetuelle brigue.
5.81 L'oyseau royal sur la cite' solaire,
Sept moys deuant fera nocturne augure:
Mur d'Orient cherra tonnaire esclaire,
Sept iours aux portes les ennemis a l'heure
5.82 Au conclud pache hors la forteresse,
Ne sortira celuy en desespoir mys:
Quant ceulx d'Arbois, de Langres, contre Bresse,
Auront monts Dolle bouscade d'ennemis
5.83 Ceulx qui auront entreprins subuertir,
Nompareil regne puissant & inuincible:
Feront par fraulde, nuictz trois aduertir,
Quant le plus grand a table lira Bible.
5.84 Naistra du goulphre & cite' immesuree,
Nay de parents obscurs & tenebreux:
Qui la puissance du grand roy reueree,
Vouldra destruire par Rouan & Eureux.
5.85 Par les Sueues & lieux circonuoisins.
Seront en guerre pour cause des nuees.
Camp marins locustes & cousins,
Du Leman faultes seront bien desnuees.
5.86 Par les deux testes, & trois bras separes,
La cite' grande sera par eaulx vexee:
Des grans d'entre eulx par exil esgares,
Par teste perse Bisance fort pressee
5.87 L'an que Saturne sera hors de seruaige,
Au franc terroir sera d'eaue inunde':
De sang Troyen sera son mariage,
Et sera seur d'Espaignolz circunder.
5.88 Sur le sablon par vn hideux deluge,
Des autres mers trouue' monstre marin:
Proche du lieu sera faict vn refuge,
Tenant Sauone esclaue de Turin.
5.89 Dedans Hongrie par Boheme, Nauarre,
Et par banniere fainctes seditions:
Par fleurs de lys pays pourtant la barre,
Contre Orleans fera esmotions
5.90 Dans les cyclades, en perinthe & larisse,
Dedans l’Sparte tout le Pelloponnesse:
Si grand famine, peste, par faulx connisse,
Neuf moys tiendra & tout le cherrouesse.
5.91 Au grand marche' qu'on dict des mensongiers,
Du tout Torrent & champ Athenien:
Seront surprins par les cheuaulx legiers,
Par Albanoys Mars Leo, Sat. vn versien.
5.92 Apres le siege tenu dixsept ans,
Cinq changeront en tel reuolu terme:
Puis sera l'vn esleu de mesme temps,
Qui des Romains ne sera trop conforme.
5.93 Soubz le terroir du rond globe lunayre,
Lors que sera dominateur Mercure:
L'isle d'Escosse fera vn luminaire,
Qui les Anglois mettra a desconfiture.
5.94 Translatera en la grand Germanie,
Brabant & Flandres, Gand, Bruges, & Bologne:
La trefue fainte le grand duc d'Armenie,
Assaillira Vienne & la Coloigne.
5.95 Nautique rame inuitera les vmbres,
Du grand Empire lors viendra conciter:
La mer Aegee des lignes les encombres
Empeschant l'onde Tyrrene desflotez.
5.96 Sur le millieu du grand monde la rose,
Pour nouueaux faictz sang public espandu:
A dire vray on aura bouche close,
Lors au besoing viendra tard l'attendu.
5.97 Le nay difforme par horreur suffoque',
Dans la cite' du grand Roy habitable:
L'edict seuere des captifz reuoque',
Gresle & tonnerre, Condom inestimable.
5.98 A quarante huict degre' climaterique,
A fin de Cancer si grande seicheresse:
Poisson en mer, fleuue: lac cuit hectique,
Bearn, Bigorre par feu ciel en destresse.
5.99 Milan, Ferrare, Turin, & Aquilleye,
Capne, Brundis vexes par gent Celtique:
Par le Lyon & phalange aquilee
Quant Rome aura le chef vieulx Britannique.
5.100 Le boutefeu par son feu attrape',
Du feu du ciel a Carcas & Cominge:
Foix, Aux, Mazeres, haut vieillart eschape',
Par ceulx de Hasse, des Saxons & Turinge.
