6.1 AVtour des monts Pyrenees grand amas
De gent estrange secourir roy nouueau:
Pres de Garonne du grand temple du Mas,
Vn Romain chef le craindra dedans l'eau.
6.2 En l'an cinq cens octante plus & moins,
On attendra le siecle bien estrange:
En l'an sept cens, & trois cieulx en tesmoings,
Que plusieurs regnes vn a cinq feront change.
6.3 Fleuue qu'esproue le nouueau nay Celtique
Sera en grande de l'Empire discorde
Le ieune prince par gent ecclesiastique,
Ostera le sceptre coronal de concorde.
6.4 La Celtiq fleuue changera de riuaige,
Plus ne tiendra la cite' d'Agripine:
Tout transmue' ormis le vieil langaige,
Saturne, Leo, Mars, Cancer en rapine.
6.5 Si grand famine par vnde pestifere.
Par pluye longue le long du polle arctique
Samarobryn cent lieux de l'hemispere,
Viuront sans loy, exempt de pollitique
6.6 Apparoistra vers le Septentrion
Non loing de Cancer l'estoille cheuelue:
Suze, Sienne, Boece, Eretrion,
Mourra de Rome grand, la nuict disperue.
6.7 Norneigre & Dace, & l'isle Britannique,
Par les vnis freres seront vexees:
Le chef Romain issu de sang Gallique
Et les copies aux forestz repoulsees.
6.8 Ceulx qui estoient en regne pour scauoir,
Au Royal change deuiendront apouuris:
Vns exiles sans appuy or n'auoir,
Lettrez & lettres ne seront a grans pris.
6.9 Aux sacres temples seront faictz escandales,
Comptes seront par honneurs & louanges:
D'vn que on graue d'argent, d'or les medalles,
La fin sera en tormens bien estranges
6.10 Vn peu de temps les temples des couleurs
De blanc & noyr des deux entremeslee:
Rouges & iaunes leur embleront les leurs,
Sang, terre, peste, faim, feu ,d'eau affollee.
6.11 Des sept rameaulx a trois seront reduictz,
Les plus aisnes seront surprins par mort,
Fratricider les deux seront seduictz,
Les coniures en dormans seront mors.
6.12 Dresser copies pour monter a l'Empire,
Du Vatican le sang Royal tiendra:
Flamans, Anglois, Espaigne auec Aspire,
Contre l'Italie & France contendra.
6.13 Vn dubieux ne viendra loing du regne,
La plus grand part le vouldra soustenir.
Vn capitole ne vouldra point qu'il regne,
Sa grande charge ne pourra maintenir.
6.14 Loing de sa terre Roy perdra la bataille,
Prompt eschappe' poursuiuy suiuant prins,
Ignare prins soubz la doree maille,
Soubz fainct habit, & l'ennemy surprins.
6.15 Dessoubz la tombe sera trouue' le prince,
Qu'aura le pris par dessus Nuremberg:
L'Espaignol Roy en Capricorne mince,
Fainct & trahy par le grand Vvitemberg.
6.16 Ce que rauy sera de ieune Milue,
Par les Normans de France & Picardie:
Les noirs du temple du lieu de Negresilue
Feront aulberge & feu de Lombardie.
6.17 Apres les limes bruslez les asiniers,
Constrainctz seront changer habitz diuers:
Les Saturnins bruslez par les meusniers,
Hors la pluspart qui ne sera couuers.
6.18 Par les phisiques le grand Roy delaisse',
Par sort non art de l'Ebrieu est en vie,
Luy & son genre au regne hault poulse',
Grace donnee a gent qui Christ enuie.
6.19 La vraye flamme engloutira la dame,
Que vouldra mettre les Innocens a feu:
Pres de l'assault l'exercite s'enflamme,
Quant dans Seuille monstre en boeuf sera veu
6.20 L'vnion faincte sera peu de duree,
Des vns changes reformes la pluspart:
Dans les vaisseaux sera gent enduree,
Lors aura Rome vn nouueau liepart.
6.21 Quant ceulx du polleartiq vnis ensemble,
Et Orient grand effraieur & crainte:
Esleu nouueau, soustenu le grand temple,
Rodes, Bisance de sang Barbare taincte.
6.22 Dedans la terre du grand temple celique,
Nepueu a Londres par paix faincte meurtry:
La barque alors deuiendra scismatique,
Liberte' faincte sera au corn & cry.
6.23 D'esprit de regne munismes descriees,
Et seront peuples esmeuz contre leur Roy,
Paix, faict nouueau, sainctes loix empirees,
Rapis onc fut en si tresdur arroy.
6.24 Mars & le sceptre se trouuera conioinct,
Dessoubz Cancer calamiteuse guerre:
Vn peu apres sera nouueau Roy oingt,
Qui par long temps pacifiera la terre.
6.25 Par Mars contraire sera la monarchie,
Du grand pescheur en trouble ruyneux;
Ieune noir, rouge prendra la hierarchie,
Les proditeurs iront iour bruyneux.
6.26 Quatre ans le siege quelque peu bien tiendra,
Vn suruiendra libidineux de vie:
Rauenne & Pyse, Veronne soustiendront,
Pour esleuer la croix de Pape enuie.
6.27 Dedans les isles de cinq fleuues a vn,
Par le croissant du grand Chyren Selin:
Par les bruynes de l'aer fureur de l'vn,
Six eschapes, caches fardeaux de lyn.
6.28 Le grand Celtique entrera dedans Rome,
Menant amas d'exiles & bannis:
Le grand pasteur mettra a mort tout homme,
Qui pour le coq estoient aux Alpes vnys.
6.29 La vefue saincte entendant les nouuelles,
De ses rameaux mis en perplex & trouble:
Qui sera duict appaiser les querelles,
Par son pourchas de razes fera comble.
6.30 Par l'apparence de faincte sainctete',
Sera trahy aux ennemis le siege.
Nuict qu'on cuidoit dormir en seurete',
Pres de Braban marcheront ceulx du Liege.
6.31 Roy trouuera ce qu'il desiroit tant,
Quant le Prelat sera reprins a tort:
Responce au duc le rendra mal content,
Qui dans Milan mettra plusieurs a mort.
6.32 Par trahysons de verges a mort battu,
Prins surmonte' sera par son desordre:
Conseil friuole au grand captif sentu,
Nez par fureur quant Begich viendra mordre.
6.33 Sa main derniere par Alus sanguinaire,
Ne se pourra par la mer guarantir:
Entre deux fleuues caindre main militaire,
Le noir l'ireux le fera repentir.
6.34 De feu volant la machination,
Viendra troubler au grand chef assieges:
Dedans sera telle sedition,
Qu'en desespoir seront les profliges.
6.35 Pres de Rion, & proche a blanche laine,
Aries, Taurus, Cancer, Leo la Vierge,
Mars, Iupiter, le Sol ardra grand plaine,
Boys & cites, lettres caches au cierge.
6.36 Ne bien ne mal par bataille terrestre,
Ne paruiendra aux confins de Perouse,
Rebeller Pise, Florence voir mal estre,
Roy nuict blesse' sur mulet a noire house.
6.37 L'oeuure ancienne se paracheuera,
Du toict cherra sur le grand mal ruyne:
Innocent faict mort on accusera,
Nocent caiche, taillis a la bruyne.
6.38 Aux profliges de paix les ennemis,
Apres auoir l'Italie supperee,
Noir sanguinaire, rouge. sera commis,
Feu, sang verser, eaue de sang couloree.
6.39 L'enfant du regne, par paternelle prinse
Expolie sera pour deliurer:
Aupres du lac Trasimen l'azur prinse,
La troupe hostaige pour trop fort s'enyurer.
6.40 Grand de Magonce pour grande soif estaindre,
Sera priue' de sa grand dignite':
Ceux de Cologne si fort le viendront plaindre,
Que la grand groppe au Ryn sera gette'.
6.41 Le second chef du regne Dannemarc,
Par ceulx de Frise & l'isle Britannique,
Fera despendre plus de cent mille marc,
Vain exploicter voyage en Italique.
6.42 A logmyon sera laisse' le regne,
Du grand Selin qui plus fera de faict:
Par les Italies estendra son enseigne,
Regi sera par prudent contrefaict.
6.43 Long temps sera sans estre habitee,
Ou Seine & Marne autour vient arrouser:
De la Tamise & martiaux temptee,
Deceuz les gardes en cuidant repouser.
6.44 De nuict par Nantes Lyris apparoistra,
Des artz marins susciteront la pluye:
Arabiq goulfre grand classe parfondra,
Vn monstre en Saxe naistra d'ours & truye.
6.45 Le gouuerneur du regne bien scauant,
Ne consentir voulant au faict Royal:
Mellile classe par le contraire vent
Le remettra a son plus desloyal.
6.46 Vn iuste sera en exil renuoye',
Par pestilence aux confins de Nonseggle,
Responce au rouge le fera desuoye',
Roy retirant a la Rane & a l'aigle.
6.47 Entre deux monts les deux grans assembles.
Delaisseront leur simulte' secrette:
Brucelle & Dolle par Langres acables,
Pour a Malignes executer leur peste.
6.48 La sainctete' trop faincte & seductiue,
Accompaigne' d'vne langue diserte:
La cite' vieille & Parme trop hastiue,
Florence & Sienne, rendront plus desertes.
6.49 De la partie de Mammer grand Pontife,
Subiuguera les confins du Dannube:
Chasser les croix par fer raffe ne riffe,
Captifz, or, bagues plus de cent mille rubes
6.50 Dedans le puys seront trouues les oz,
Sera l'incest, commis par la maratre:
L'estat change' on querra bruict & loz,
Et aura Mars atendant pour son astre.
6.51 Peuple assemble', voir nouueau expectacle.
Princes & Roys par plusieurs assistans,
Pilliers faillir, murs: mais comme miracle
Le Roy sauue' & trente des instans.
6.52 En lieu du grand qui sera condemne',
De prison hors son amy en sa place:
L'espoir Troyen en six moys ioinct, mort nay,,
Le Sol a l'vrne seront prins fleuues en glace.
6.53 Le grand Prelat Celtique a Roy suspect,
De nuict par cours sortira hors du regne:
Par duc fertille a son grand Roy Bretaigne,
Bisance a Cipres & Tunes insuspect.
6.54 Au poinct du iour au second chant du coq,
Ceulx de Tunes, de Fez, & de Bugie,
Par les Arabes, captif le Roy Maroq,
L'an mil six cens & sept, de Liturgie.
6.55 Au chalme' Duc en arrachant l'esponce,
Voille Arabesque voir, subit descouuerte:
Tripolis, Chio, & ceulx de Trapesonce,
Duc prins, Marnegro & la cite' deserte.
6.56 La crainte armee de l'ennemy Narbon
Effrayera si fort les Hesperiques:
Parpignan vuide par l'aueugle darbon,
Lors Barcelon par mer donra les piques.
6.57 Celuy qu'estoit bien auant dans le regne,
Ayant chef rouge proche a la hierarchie,
Aspre & cruel, & se fera tant craindre,
Succedera a sacre' monarchie.
6.58 Entre les deux monarques esloignes,
Lors que le Sol par Selin clair perdue,
Simulte' grande entre deux indignes,
Qu'aux Isles & Sienne la liberte rendue.
6.59 Dame en fureur par raige d'adultere,
Viendra a son prince coniurer non de dire:
Mais bref cogneu sera le vitupere,
Que seront mis dixsept a martire.
6.60 Le Prince hors de son terroir Celtique
Sera trahy, deceu par interprete:
Rouan, Rochelle par ceulx de l'Armorique
Au port de Blaue deceuz par moyne & prebstre.
6.61 Le grand tappis plie' ne monstrera,
Fors qu'a demy la pluspart de l'histoire:
Chasse' du regne loing aspre apparoistra,
Qu'au faict bellique chascun le viendra croire.
6.62 Trop tard tous deux, les fleurs seront perdues,
Contre la loy serpent ne voudra faire:
Des ligueurs forces par gallotz confondues,
Sauone, Albingne par monech grand martyre.
6.63 La dame seule au regne demeuree.
L'vnic estaint premier au lict d'honneur:
Sept ans sera de douleur exploree,
Puis longue vie au regne par grand heur.
6.64 On ne tiendra pache aucune arreste',
Tous receuans iront par tromperie:
De paix & trefue & terre & mer proteste.
Par Barcelone classe prins d'industrie.
6.65 Gris & bureau, demie ouuerte guerre,
De nuict seront assaillis & pilles:
Le bureau prins passera par la serre,
Son temple ouuert, deux au plastre grilles.
6.66 Au fondement de la nouuelle secte,
Seront les oz du grand Romain trouues,
Sepulcre en marbre apparoistra couuerte,
Terre trembler en Auril, mal enfouetz.
6.67 Au grand Empire paruiendra tout vn autre,
Bonte' distant plus de felicite':
Regi par vn issu non loing du peaultre,
Corruer regnes grande infelicite'.
6.68 Lors que souldartz fureur seditieuse.
Contre leur chef feront de nuict fer luire:
Ennemy d'Albe soir par main furieuse,
Lors vexer, Rome, & principaulx seduire.
6.69 La pitie' grande sera sans loing tarder,
Ceulx qui donnoient seront constrains de prendre:
Nudz Affamez de froit, soif, soy bander,
Les monts passer commettant grand esclandre.
6.70 Au chef du monde le grand Chyren sera,
Plus oultre apres ayme craint, redoubte':
Son bruit & loz les cieulx surpassera,
Et du seul tiltre victeur fort contente'.
6.71 Quand on viendra le grand roy parenter
Auant qu'il ait du tout l'ame rendue:
Celuy qui moins le viendra lamenter,
Par lyons, d’aigles, croix couronne vendue.
6.72 Par fureur faincte d'esmotion diuine,
Sera la femme du grand fort violee:
Iuges voulans damner telle doctrine,
Victime au peuple ignorant imolee.
6.73 En cite' grande vn moyne & artisan,
Pres de la porte loges & aux murailles,
Contre Modene secret, caue disant
Trahys pour faire soubz couleur d'espousailles.
6.74 La dechassee au regne tournera,
Ses ennemis trouues des coniures:
Plus que iamais son temps triomphera,
Trois & septante a mort trop asseures
6.75 Le grand pilot par Roy sera mande',
Laisser la classe pour plus hault lieu attaindre:
Sept ans apres sera contrebande',
Barbare armee viendra Venise caindre.
6.76 La cite' antique d'antenoree forge,
Plus ne pouuant le tyran supporter
Le manchet fainct au temple couper gorge,
Les siens le peuple a mort viendra bouter.
6.77 Par la victoire du deceu fraudulente,
Deux classes vne, la reuolte Germaine,
Le chef murtry & son filz dans la tente,
Florence, Imole pourchasses dans romaine.
6.78 Crier victoire du grand Selin croissant:
Par les Romains sera l'Aigle clame',
Ticcin , Milan & Gennes n’y consent,
Puis par eulx mesmes Basil grand reclame'.
6.79 Pres du Tesin les habitans de Loyre,
Garonne & Saone Seine, Tain & Gironde,
Oultre les monts dresseront promontoire.
Conflict donne' Pau granci, submerge onde.
6.80 De Fez le regne paruiendra a ceulx d'Europe,
Feu leur cite' & lame trenchera.
Le grand d'Asie terre & mer a grand troupe,
Que bleux, pers, croix, a mort deschassera.
6.81 Pleurs, crys & plainctz, hurlement, effraieur,
Coeur inhumain, cruel noir, & transy.
Leman les isles de Gennes les maieurs,
Sang espancher, frofaim a nul mercy.
6.82 Par les desertz de lieu, libre, & farouche,
Viendra errer nepueu du grand Pontife:
Assomme' a sept auecques lourde souche,
Par ceulx qu'apres occuperont le cyphe.
6.83 Celuy qu'aura tant d'honneurs & caresses.
A son entree de la gaule Belgique.
Vn temps apres fera tant de rudesses,
Et sera contre a la fleur tant bellique.
6.84 Celuy qu'en Sparte Claude ne peult regner,
Il fera tant par voye seductiue:
Que du court, long, le fera araigner,
Que contre Roy fera sa perspectiue.
6.85 La grand cite' de Tharse par Gaulois.
Sera destruicte, captifz tous a Turban:
Secours par mer du grand Portugalois,
Premier d'este' le iour du sacre Vrban.
6.86 Le grand Prelat vn iour apres son songe,
Interprete' au rebours de son sens:
De la Gascoigne luy suruiendra vn monge,
Qui fera eslire le grand Prelat de sens.
6.87 L'eslection faicte dans Frankfort,
N'aura nul lieu, Milan s'opposera:
Le sien plus proche semblera si grand fort,
Que oultre le Ryn es mareschz chassera.
6.88 Vn regne grand demourra desole',
Aupres del l'Hebro se feront assemblees:
Monts Pyrenees le rendront console',
Lors que dans May seront terres tremblees.
6.89 Entre deux cymbes piedz & mains estaches,
De miel face oingt, & de laict substante',
Guespes & mouches, fitine amour fasches
Poccilateur faulcer, Cyphe tempte'.
6.90 L'honnissement puant abhominable
Apres le faict sera felicite'
Grand excuse pour n'estre fauorable,
Qu'a paix Neptune ne sera incite'.
6.91 Du conducteur de la guerre naualle,
Rouge effrene' seuere horrible grippe,
Captif eschappe' de l'aisne' dans la baste:
Quant il naistra du grand vn filz Agrippe.
6.92 Prince de beaulte' tant venuste,
Au chef menee, le second faict trahy.
La cite' au glaifue de pouldre face aduste,
Par trop grand meurtre le chef du roy hay
6.93 Prelat auare d'ambition trompe',
Rien ne sera que trop viendra cuider:
Ses messagiers & luy bien attrape',
Tout au rebours voir, qui les boys fendroit.
6.94 Vn Roy ire' sera aux sedifragues,
Quant interdictz seront harnois de guerre:
La poison taincte au sucre par les fragues
Par eaux meurtris, mors, disant serre, serre
6.95 Par detracteur calumnie a puis nay,
Quant istront faictz enormes & martiaulx:
La moindre part dubieuse a l'aisnay,
Et tost au regne seront faictz partiaulx
6.96 Grande cite' a souldartz habandonnee,
Onques ny eust mortel tumult si proche:
O quel hideuse calamite' s'approche,
Fors vne offence n'y sera pardonnee
6.97 Cinq & quarante degres ciel bruslera
Feu approucher de la grand cite' neufue
Instant grand flamme esparse saultera
Quant on vouldra des Normans faire preuue.
6.98 Ruyne' aux Volsques de peur si fort terribles
Leur grand cite' taincte, faict pestilent:
Piller Sol, Lune & violer leurs temples:
Et les deux fleuues rougir de sang coulant.
6.99 L'ennemy docte se tournera confus.
Grand camp malade, & desfaict par embusches,
Monts Pyrenees & Poenus luy seront faicts refus,
Proche du fleuue descouurant antiques oruches.
