7.1 L'ARC du tresor par Achiles deceu
Aux procrees sceu la quadrangulaire:
Au faict Royal le comment sera sceu
Corps veu pendu au veu du populaire.
7.2 Par Mars ouuert Arles ne donra guerre,
De nuict seront les souldartz estonnes:
Noir, blanc a l'inde dissimules en terre,
Soubz la faincte vmbre traistres verez & sonnes.
7.3 Apres de France la victoire nauale,
Les Barchinons, Saillinons, les Phocens.
Lierre d'or, l'enclume serre' dedans la basle,
Ceulx de Ptolon au fraud seront consens.
7.4 Le duc de Langres assiege' dedans Dolle,
Accompaigne' d'Ostun & Lyonnois:
Geneue, Auspurg, ioinct ceulx de Mirandole,
Passer les monts contre les Anconnois.
7.5 Vin sur la table en sera espandu,
Le tiers n'aura celle qu'il pretendoit:
Deux fois du noir de Parme descendu,
Perouse a Pize fera ce qu'il cuidoit.
7.6 Naples, Palerme, & toute la Secille,
Par main barbare sera inhabitee:
Corsicque, Salerne & de Sardeigne l'isle,
Faim peste, guerre fin de maulx intemptee
7.7 Sur le combat de grans cheuaulx legiers,
On criera le grand croissant confond:
De nuict tuer monts, habitz de bergiers,
Abismes rouges dans le fosse' profond.
7.8 Flora fuis, fuis le plus proche Romain,
Au Fesulan sera conflict donne':
Sang espandu les plus grans prins a main,
Temple ne sexe ne sera pardonne'.
7.9 Dame a l'absence de son grand capitaine,
Sera priee d'amours du Viceroy:
Faincte promesse & malheureuse estraine,
Entre les mains du grand prince Barroys.
7.10 Par le grand prince l’imitrophe du Mans,
Preux & vaillant chef du grand exercite:
Par mer & terre de Gallotz & Normans,
Caspre passer Barcelone pille' isle.
7.11 L'enfant Royal contemnera la mere,
Oeil, piedz blesses, rude, inhobeissant,
Nouuelle a dame estrange & bien amere,
Seront tues des siens plus de cinq cens.
7.12 Le grand puisne fera fin de la guerre
Aux Dieux assemble les excuses:
Cahors, Moissac iront long de la serre,
Reffus Lestore, les Agennois razes.
7.13 De la cite' marine & tributaire
La teste raze prendra la satrapie:
Chasser sordide qui puis sera contraire,
Par quatorze ans tiendra la tyrannie.
7.14 Faulx exposer viendra topographie,
Seront les cruches des monumens ouuertes:
Pulluler secte, faincte philosophie,
Pour blanches, noires, & pour antiques vertes.
7.15 Deuant cite' de l'insubre contree,
Sept ans sera le siege deuant mis:
Le tresgrand Roy y fera son entree,
Cite', puis libre hors de ses ennemis.
7.16 Entree profonde par la grand Royne faicte
Rendra le lieu puissant inaccessible:
L'armee des trois lyons sera deffaicte,
Faisant dedans cas hideux & terrible.
7.17 Le prince rare de pitie' & clemence
Viendra changer par mort grand cognoissance
Par grand repos le regne trauaille',
Lors que le grand tost sera estrille'.
7.18 Les assieges couloureront leurs paches,
Sept iours apres feront cruelle issue,
Dans repoulses feu, sang, sept mis a l'hache
Dame captiue qu'auoit la paix tissue
7.19 Le fort Nicene ne sera combatu:
Vaincu sera par rutilant metal.
Son faict sera vn long temps debatu,
Aux citadins estrange espouuental.
7.20 Ambassadeurs de la Toscuane langue,
Auril & May Alpes & mer passer
Celuy de veau expousera l'harangue,
Vie Gauloise ne venant effacer.
7.21 Par pestilente inimitie' Volsicque,
Dissimulee chassera le tyran:
Au pont de Sorgues se fera la traffique
De mettre a mort luy & son adherant.
7.22 Les citoyens de Mesopotamie
Yres encontre amis de Tarraconne,
Geux, ritz, banquetz, toute gent endormie
Vicaire au rosne, prins cite', ceux d'Ausone.
7.23 Le Royal sceptre sera contrainct de prendre,
Ce que ses predecesseurs auoient engaige'
Puis que l'aneau on fera mal entendre,
Lors qu'on viendra le palays saccager.
7.24 L'enseuely sortira du tombeau,
Fera de chaines lier le fort du pont:
Empoysonne' auec oeufz de barbeau,
Grand de Lorraine par le Marquis du Pont.
7.25 Par guerre longue tout l'exercite expuise,
Que pour souldartz ne trouueront pecune,
Lieu d'or, d'argent, cuir on viendra cuser,
Gaulois aerain, signe croissant de Lune.
7.26 Fustes & galees autour de sept nauires,
Sera liuree vne mortelle guerre:
Chef de Madric receura coup de vires,
Deux eschapees, & cinq menees a terre
7.27 Au cainct de Vast la grand caualerie,
Proche a Ferrare empeschee au bagaige:
Prompt a Turin feront tel volerie,
Que dans le fortrauiront leur hostaige.
7.28 Le capitaine conduira grande proye,
Sur la montaigne des ennemis plus proche:
Enuironne' par feu fera tel voye,
Tous eschapez or trente mis en broche.
7.29 Le grand duc d'Albe se viendra rebeller,
A ses grans peres fera le tradiment:
Le grand de Guise le viendra debeller,
Captif mene' & dresse' monument.
7.30 Le sac s'approche, feu grand, sang espandu
Po grand fleuues, aux bouuiers l'entreprinse,
De Gennes, Nice apres long attendu,
Foussan, Turin, a Sauillan la prinse.
7.31 De Languedoc, & Guienne plus de dix
Mille vouldront les Alpes repasser:
Grans Allobroges marcher contre Brundis
Aquin & Bresse les viendront recasser.
7.32 Du mont Royal naistra d'vne casane,
Qui caue, & comte viendra tyranniser:
Dresser copie de la marche Millane,
Fauene, Florence d'or & gents expuiser
7.33 Par fraulde regne, forces expolier,
La classe, obsesse, passaiges a l'espie.
Deux fainctz amys se viendront rallier,
Esueiller hayne de long temps assoupie.
7.34 En grand regret sera la gent Gauloise,
Coeur vain, legier, croira temerite':
Pain, sel, ne vin, eaue, venim ne ceruoise,
Plus grand captif, faim, froit, necessite'.
7.35 La grande pesche viendra plaindre, plorer,
D'auoir esleu, trompes seront en l'aage
Guiere auec eulx ne vouldra demourer,
Deceu sera par ceulx de son langaige.
7.36 Dieu le ciel tout le diuin verbe a l'vnde,
Pourte' par rouges sept razes a Bisance:
Contre les oingtz trois cens de Trebisonde
Deux loix mettront, & horreur, puis credence
7.37 Dix enuoyes, chef de nef mettre a mort,
D'vn aduerty, en classe guerre ouuerte:
Confusion chef, l'vn se picque & mord,
Leryn, stecades nefz, cap dedans la nerte.
7.38 L'aisne' Royal sur coursier voltigeant,
Picquer viendra, si rudement courir
Gueulle, lypee, pied dans l'estrein pleignant,
Traine', tire', horriblement mourir.
7.39 Le conducteur de l'armee Francoise,
Cuidant perdre le principal phalange:
Par sus paue' de lauaigne & d'ardoise,
Soy parfondra par Gennes gent estrange.
7.40 Dedans tonneaux hors oingtz d'huille & gresse
Seront vingtvn deuant le port fermes
Au second guet par mort feront prouesse.
Gaigner les portes & du guet assommes
7.41 Les oz des piedz & des mains enserres,
Par bruit maison long temps inhabitee,
Seront par songes concauant deterres,
Maison salubre & sans bruyt habitee
7.42 Deux de poyson saisiz, nouueau venuz
Dans la cuisine du grand Prince verser:
Par le souillard tous deux au faict cogneuz,
Prins qui cuidoit de mort l'aisne' vexer.
