8.1 PAV, NAY, LORON plus feu qu'a sang sera,
Laude nager, fuir grand aux surrez:
Les agassas entree refusera,
Pampon, Durance les tiendra enserrez
8.2 Condon & Aux & autour de Mirande
Ie voy du ciel feu qui les enuironne:
Sol Mars conioint au Lyon puis marmande
Fouldre, grand gresle, mur tombe dans Garonne
8.3 Au fort chasteau de Viglanne & Resuiers
Sera serre le puisnay de Nancy:
Dedans Turin seront ards les premiers
Lors que de dueil Lyon sera transy.
8.4 Dedans Monech le coq sera receu,
Le Cardinal de France apparoistra
Par Logarion Romain sera deceu,
Foiblesse a l'aigle, & force au coq naistra.
8.5 Apparoistra temple luisant orne',
La lampe & cierge a Borne & Bretueil:
Pour la lucerne le canton destorne',
Quand on verra le grand coq au cercueil.
8.6 Clarte' fulgure a Lyon apparante
Luysant, print Malte, subit sera estainte:
Sardon, Mauris traitera decepuante,
Geneue a Londes a coq trahyson fainte.
8.7 Verceil, Milan donra intelligence
Dedans Tycin sera faite la playe,
Courir par Siene eau, sang feu par Florence,
Vnique choir d'hault en bas faisant maye.
8.8 Pres de linterne dans de tonnes fermez,
Chiuaz fera pour l'aigle la menee,
L'esleu casse' luy ses gens enfermez,
Dedans Turin rapt espouse emmenee.
8.9 Pendant que l'aigle & le coq a Sauone
Seront vnis Mer, Levant & Ongrie,
L'armee a Naples, Palerne, Marque d'Ancone,
Rome, Venise par Barb’ horrible crie.
8.10 Puanteur grande sortira de Lausanne,
Qu'on ne saura l’origine du fait.
Lon mettra hors toute la gent loingtaine,
Feu veu au ciel, peuple estranger desfait.
8.11 Peuple infiny paroistra a Vicence
Sans force feu brusler la Basilique:
Pres de Lunage desfait grand de Valence,
Lors que Venise par more prendra pique
8.12 Apparoistra aupres de Buffalorre
L'hault & procere entre' dedans Milan,
L'abbe' de Foix auec ceux de saint Morre
Feront la forbe abillez en vilan.
8.13 Le croise' frere par amour effrenee
Fera par Praytus Bellerophon mourir,
Classe a mil ans la femme forcenee
Beu breuuage, tous deux apres perir.
8.14 Le grand credit d'or, & d'argent l'abondance
Fera aueugler par libide l'honneur,
Sera cogneu d'adultere l'offence
Qui paruiendra a son grand deshonneur.
8.15 Vers Aquilon grands efforts par hommasse
Presque l'Europe & l'vniuers vexer,
Les deux eclypses mettra en telle chasse,
Et aux Pannons vie & mort renforcer.
8.16 Au lieu que HIERON feit sa nef fabriquer.
Si grand deluge sera & si subite,
Qu'on n'aura lieu ne terres s'atacquer,
L'onde monter Fesulan Olympique.
8.17 Les biens aisez subit seront desmis,
Par les trois freres le monde mis en trouble.
Cite' marine saisiront ennemis
Faim, feu, sang, peste, & de tous maux le double.
8.18 De Flora issue de sa mort sera cause,
Vn temps deuant par ieusne & vieille bueyre
Par les trois lys luy feront telle pause,
Par son fruit sauue comme chair crue mueyre.
8.19 A soubstenir la grand cappe troublee,
Pour l'esclaircir les rouges marcheront:
De mort famille sera presque accablee,
Les rouges rouges le rouge assomeront.
8.20 Le faux messaige par election fainte,
Courir par vrben, rompue pache arreste:
Voix acheptees, de sang chapelle tainte,
Et a vn autre l'empire contraicte.
8.21 Au port de Agde trois fustes entreront,
Portant l'infect, non foy & pestilence,
Passant le pont mil milles embleront,
Et le pont rompre a tierce resistance.
8.22 Gorsan, Narbonne, par le sel aduertir
Tucham, la grace Parpignam trahye,
La ville rouge n'y vouldra consentir,
Par haulte vol drap gris vie faillie.
8.23 Lettres trouuees de la royne les coffres,
Point de subscrit sans aucun nom d'hauteur:
Par la police seront cachez les offres,
Qu'on ne scaura qui sera l'amateur
8.24 Le lieutenant a l'entree de l’huys
Assommera le grand de Parpignan,
En se cuidant sauluer a Monpertuis,
Sera deceu bastard de Lusignan.
8.25 Coeur de l'amant ouuert d'amour fertiue
Dans le ruysseau fera rauyr la Dame:
Le demy mal contrefera lassiue,
Le pere a deux priuera corps de l'ame.
8.26 De Caton es trouues en Barsellonne,
Mys descouuers lieu terrouers & ruyne,
Le grand qui tient ne tient vouldra Pamplonne,
Par l'abbage de Monferrat bruyne
8.27 La voye auxelle l'vne sur l'autre fornix
Du muy deser hor mis braue & genest,
L'escript d'empereur le fenix
Veu en celuy ce qu'a nul autre n'est.
8.28 Les simulachres d'or & d'argent enflez,
Qu'apres le rapt au lac furent gettez,
Au descouuert estaincts tous & troublez,
Au marbre escript, prescripz intergetez.
8.29 Au quart pillier lon sacre a Saturne,
Par tremblant terre & deluge fendu
Soubz l'edifice Saturnin trouuee vrne,
D'or Capion rauy & puis rendu.
8.30 Dedans Tholoze non loing de Beluezer,
Faisant vn puys loing, palais d'espectacle
Thresor trouue' vn chacun ira vexer,
Et en deux locz tout & pres del vasacle.
8.31 Premier grand fruit le prince de Pesquiere:
Mais puis viendra bien & cruel malin,
Dedans Venise perdra sa gloire fiere,
Et mys a mal par plus ioyue Celin.
8.32 Garde toy roy Gaulois de ton nepueu,
Qui fera tant que ton vnique filz
Sera meurtry a Venus faisant voeu;
Accompaigne' de nuict que trois & six.
8.33 Le grand naistra de Veronne & Vincence,
Qui portera vn surnom bien indigne
Qui a Venise vouldra faire vengeance,
Luy mesme prins homme du guet & signe.
8.34 Apres victoire du Lyon au Lyon
Sus la montaigne de IVRA Secatombe
Delues & brodes septieme million
Lyon, Vlme a Mausol mort & tombe
8.35 Dedans l'entree de Garonne & Bayse
Et la forest non loing de Damazan
Du marsaues gelees, puis gresle & bize
Dordonnois gelle par erreur de mezan.
8.36 Sera commis conte oingdre aduche'
De Saulne & sainct Aulbin & Bel l'oeuure
Pauer de marbre de tours loing espluche'
Non Bleteram resister & chef d'oeuure.
8.37 La forteresse aupres de la Tamise
Cherra par lors le Roy dedans serre':
Aupres du pont sera veu en chemise
Vn deuant mort, puis dans le fortbarre'.
8.38 Le Roy de Bloys dans Auignon regner
Vne autre foys le peuple emonopolle
Dedans le Rosne par murs fera baigner
Iusques a cinq le dernier pres de Nolle.
8.39 Qu'aura este' par prince Bizantin,
Sera tollu par prince de Tholoze
La foy de Foix par le chief Tholentin
Luy faillira ne refusant l'espouse.
8.40 Le sang du Iuste par Taurer la daurade,
Pour se venger contre les Saturnins
Au nouueau lac plongeront la maynade,
Puis marcheront contre les Albanins.
8.41 Esleu sera Renad ne sonnant mot,
Faisant le saint public viuant pain d'orge,
Tyrannizer apres tant a vn cop,
Mettant a pied des plus grans sus la gorge.
8.42 Par auarice, par force, & violence
Viendra vexer les siens chiefz d'Orleans,
Pres saint Memire assault & resistance
Mort dans sa tante diront qu'il dort leans.
8.43 Par le decide de deux choses bastars,
Nepueu du sang occupera le regne,
Dedans lectoyre seront les coups de dars,
Nepueu par peur pleira l'enseigne
8.44 Le procree naturel dogmion,
De sept a neuf du chemin destorner:
A roy de longue & amy aumi hom.
Doit a Nauarre fort de PAV prosterner.
8.45 La main escharpe & la iambe bandee,
Longs puis nay de Calais portera,
Au mot du guet la mort sera tardee,
Puis dans le temple a Pasques saignera.
8.46 Pol mensolee mourra trois lieues du rosne,
Fuis les deux prochains tarasc destrois:
Car Mars fera le plus horrible trosne,
De coq & d'aigle de France freres trois.
8.47 Lac Trasmenien portera tesmoignage,
Des coniurez sarez dedans Perouse
Vn despolle contrefera le sage:
Tuant Tedesq de sterne & minuse.
8.48 Saturne en Cancer, Iupiter auec Mars,
Dedans Feurier Chaldondon saluaterre,
Sault Castallon assailly de trois pars,
Pres de Verbiesque conflit mortelle guerre.
8.49 Satur, au beuf ioue en l'eau, Mars en fleiche,
Six de Feurier mortalite' donra,
Ceux de Tardaigne a Bruge si grand breche,
Qu'a Ponteroso chef Barbarin mourra.
8.50 La pestilence l'entour de Capadille,
Vn autre faim pres de Sagont s'appreste:
Le cheualier bastard de bon senille,
Au grand de Thunes fera trancher la teste.
8.51 Le Bizantin faisant oblation,
Apres auoir Cordube a soy reprinse:
Son chemin long repos pamplation,
Mer passant proy par la Colongna prinse
8.52 Le roy de Bloys dans Auignon regner.
D'amboise & seme viendra le long de Lyndre:
Ongle a Poytiers sainctes aesles ruiner,
Deuant Boni.
8.53 Dedans Bolongne vouldra lauer ses fautes,
Il ne pourra au temple du soleil:
Il volera faisant choses si haultes,
En hierarchie n'en fut oncq vn pareil.
8.54 Soubz la colleur du traicte' mariage,
Fait par magnanime par grand Chyren felin:
Quintin, Arras recouurez au voyage,
D'espaignolz fait second banc macelin
8.55 Entre deux fleuues se verra enserre',
Tonneaux & caques vnis a passer outre:
Huict pontz rompus chef a tant enferre',
Enfans parfaictz sont iugutez en coultre.
8.56 La bande foible la terre occupera,
Ceux du hault lieu feront horribles crys:
Le gros troppeau d'estre coin troublera,
Tombe pres D.nebro descouuers les escris
8.57 De souldat simple paruiendra en empire,
De robe courte paruiendra a la longue:
Vaillant aux armes en eglise ou plus pyre,
Vexer les prestres comme l'eau fait l'esponge.
8.58 Regne en querelle aux freres diuise',
Prendre les armes & le nom Britannique:
Tiltre Anglican sera tard aduise',
Surprins de nuict mener a l'air Gallique.
8.59 Par deux fois hault, par deux fois mis a bas,
L'orient aussi l'occident foyblira:
Son aduersaire apres plusieurs combats,
Par mer chasse au besoing faillira.
8.60 Premier en Gaule, premier en Romanie,
Par mer & terre aux Angloys & Parys,
Merueilleux faitz par celle grand mesnie,
Violant terax perdra le NORLARIS.
8.61 Iamais par le decouurement du iour,
Ne paruiendra au signe sceptrifere:
Que tous ses sieges ne soyent en seiour,
Portant au coq don du TAG amifere.
8.62 Lors qu'on verra expiler le saint temple,
Plus grand du rosne leurs sacrez prophaner
Par eux naistra pestilence si ample,
Roy fuit iniuste ne fera condemner
8.63 Quant l'adultere blesse' sans coup aura,
Meurdry la femme & le filz par despit,
Femme assoumee l'enfant estranglera:
Huit captifz prins, s'estouffer sans respit.
8.64 Dedans les Isles les enfans transportez,
Les deux de sept seront en desespoir:
Ceux du terrouer en seront supportez,
Nom pelle prins des ligues fuy l'espoir.
8.65 Le vieux frustre' du principal espoir,
Il paruiendra au chef de son empire:
Vingt mois tiendra le regne a grand pouuoir,
Tiran, cruel en delaissant vn pire.
8.66 Quand l'escriture D.M. trouuee,
Et caue antique a lampe descouuerte,
Loy, Roy, & Prince Vlpian esprouuee,
Pauillon Royne & Duc sous la couuerte.
8.67 PAR. CAR. NERSAF, a ruine grand discorde,
Ne l'vn ne l'autre n'aura election,
Nersaf du peuple aura amour & concorde,
Ferrare, Collonne grande protection.
8.68 Vieux Cardinal par le ieusne deceu,
Hors de sa charge se verra desarme':
Arles ne monstres double soit aperceu,
Et Liqueduct & le Prince embausme'.
8.69 Aupres du ieune le vieux ange baisser,
Et le viendra surmonter a la fin:
Dix ans esgaux au plus vieux rabaisser,
De trois deux l'vn l’huitiesme seraphin.
8.70 Il entrera vilain, meschant, infame
Tyrannisant la Mesopotamie
Tous amys fait d'adulterine d’ame,
Tertre horrible noir de phisonomie.
8.71 Croistra le nombre si grand des astronomes
Chassez, bannis & liures censurez.
L'an mil six cens & sept par sacre glomes,
Que nul aux sacres ne seront asseurez.
8.72 Champ Perusin o l'enorme deffaite,
Et le conflit tout au pres de Rauenne,
Passage sacre lors qu'on fera la feste.
Vainqueur vaincu cheual manger la venne.
8.73 Soldat Barbare le grand Roy frappera,
Iniustement non eslongne' de mort
L'auare mere du fait cause sera,
Coniurateur & regne en grand remort.
8.74 En terre neufue bien auant Roy entre',
Pendant subges luy viendront faire acueil:
Sa perfidie aura tel recontre',
Qu'aux citadins lieu de feste & recueil.
8.75 Le pere & filz seront meurdris ensemble,
Le prefecteur dedans son pauillon:
La mere a Tours du filz ventre aura enfle,
Caiche verdure de feuilles papillon.
8.76 Plus Macelin que roy en Angleterre,
Lieu obscur nay par force aura l'empire:
Lasche sans foy, sans loy saignera terre,
Son temps s'approche si pres que ie souspire.
8.77 L'antechrist trois bien tost annichilez,
Vingt & sept ans sang durera sa guerre:
Les heretiques mortz, captifs exilez,
Sang corps humain eau rogie gresler terre.
8.78 Vn Bragamas auec la langue torte,
Viendra des dieux le sanctuaire:
Aux heretiques il ouurira la porte,
En suscitant l'eglise militaire.
8.79 Qui par fer pere perdra nay de Nonnaire,
De Gorgon sur la sera sang perfetant:
En terre estrange fera si tout de taire,
Qui bruslera luy mesme & son entant.
8.80 Des innocens le sang de vefue & vierge,
Tant de maulx faitz par moyen se grand Roge:
Saintz simulachres trempez en ardant cierge,
De frayeur crainte ne verra nul que boge
8.81 Le neuf empire en desolation,
Sera change' du pole aquilonaire:
De la Sicile viendra l'esmotion,
Troubler l'emprise a Philip tributaire.
8.82 Ronge long, sec faisant du bon valet,
A la parfin n'aura que son congie:
Poignant poyson, & lettres au collet,
Sera saisi eschappe en dangie.
8.83 Le plus grand voile hors du port de Zara,
Pres de Bisance fera son entreprinse:
D'ennemy perte & l'amy ne sera,
Le tiers a deux fera grand pille & prinse.
8.84 Paterne orra de la Sicile crie,
Tous les aprests du goulphre de Trieste,
Qui s'entendra iusque a la trinacrie,
De tant de voiles fuy, fuy l'horrible peste.
8.85 Entre Bayonne & a saint Iean de Lux
Sera pose' de Mars la promottoire
Aux Hanix d'Aquilon Nanar hostera lux,
Puis suffocque' au lict sans adiutoire.
8.86 Par Arnani tholoser ville franque,
Bande infinie par le mont Adrian:
Passe riuiere, Hurin par pont la planque
Bayonne entrer tous Bihoro criant
8.87 Mort conspiree viendra en plein effect,
Charge donnee & voiage de mort:
Esleu, cree receu par siens deffait.
Sang d'innocence deuant foy par remort.
8.88 Dans la Sardeigne vn noble Roy viendra,
Que ne tiendra que trois ans le royaume.
Plusieurs coulleurs auec soy conioindra,
Luy mesmes apres soin someil marrit scome.
8.89 Pour ne tumber entre mains de son oncle,
Qui ses enfans par regner trucidez:
Orant au peuple mettant pied sur Peloncle
Mort & traisne' entre cheuaulx bardez.
8.90 Quand des croisez vn trouue' de sens trouble,
En lieu du sacre verra vn boeuf cornu:
Par vierge porc son lieu lors sera comble,
Par roy plus ordre ne sera soustenu.
8.91 Frymy les champs des Rodanes entrees
Ou les croysez seront presque vnys,
Les deux brassieres en pisces rencontrees
Et vn grand nombre par deluge punis.
8.92 Loin hors du regne mis en hazard voiage
Grand ost duyra pour soy l'occupera,
Le roy tiendra les siens captif ostrage
A son retour tout pays pillera.
8.93 Sept moys sans plus obtiendra prelature
Par son deces grand scisme fera naistre:
Sept moys tiendra vn autre la preture
Pres de Venise paix vnion renaistre.
8.94 Deuant le lac ou plus cher fut gette'
De sept mois, & son host desconfit
Seront Hyspans par Albannois gastez,
Par delay perte en donnant le conflict.
8.95 Le seducteur sera mis en la fosse,
Et estache' iusques a quelque temps,
Le clerc vny le chef auec sa crosse:
Pycante droite attraira les contens
8.96 La synagogue sterile sans nul fruit
Sera receu entre les infideles,
De Babylon la fille du porsuit:
Misere & triste luy trenchera les aisles.
8.97 Aux fins du VAR changer les pompotans,
Pres du riuage les trois beaux enfans naistre:
Ruyne au peuple par aage competans,
Regne au pays changer plus voir croistre.
8.98 Des gens d'eglise sang sera espandu,
Comme de l'eau en si grande abondance:
Et d'vn long temps ne sera restanche',
Ve ve au clerc ruyne & doleance.
8.99 Par la puissance des trois rois temporelz,
En autre lieu sera mis le saint siege:
Ou la substance de l'esprit corporel,
Sera remys & receu pour vray siege
8.100 Pour l'abondance de larme respandue,
Du hault en bas par le bas au plus hault:
Trop grande foy par ieu vie perdue,
De soif mourir par habondant deffault.
