9.1 Dans la maison du traducteur de Bourc,
Seront les lettres trouuees sus la table,
Bourgne, roux, blanc, chanu tiendra de cours,
Qui changera au nouueau connestable.
9.2 Du hault du mont Auentin voix ouye,
Vuydez vuydez de tous les deux costez:
Du sang des rouges sera l'ire assomye,
D'Arimin Prato, Columna debotez.
9.3 La magna vaqua a Rauenne grand trouble,
Conduictz par quinze enserrez a Fornase:
A Rome naistre deux monstres a teste double
Sang, feu, deluge, les plus grands a l'espase.
9.4 L'an ensuyuant descouuertz par deluge,
Deux chefs esleuz, le premier ne tiendra
De fuyr vmbre a l'vn d'eux le refuge,
Saccagee case qui premier maintiendra.
9.5 Tiers doit du pied au premier semblera
A vn nouueau monarque de bas hault,
Qui Pyse & Lucques Tyran occupera
Du precedant corriger le deffault.
9.6 Par la Guyenne infinite' d'Anglois
Occuperont par nom d'Anglaquitaine,
Du Languedoc Ispalme Bourdeloys,
Qu'ilz nommeront apres Barboxitaine.
9.7 Qui ouurira le monument trouue',
Et ne viendra le serrer promptement,
Mal luy viendra, & ne pourra prouue'
Si mieux doit estre roy Breton ou Normand
9.8 Puisnay Roy fait son pere mettra a mort,
Apres conflit de mort tres inhoneste:
Escrit trouue', soubson donra remort,
Quand loup chasse' pose sus la couchette.
9.9 Quand lampe ardente de feu inextinguible
Sera trouue' au temple des Vestales.
Enfant trouue' feu, eau passant par trible:
Perir eau Nymes, Tholose cheoir les halles.
9.10 Moyne moynesse d'enfant mort expose',
Mourir par ourse, & rauy par verrier,
Par Fois & Pamyes le camp sera pose'
Contre Tholose Carcas dresser forrier.
9.11 Le iuste a tort a mort lon viendra mettre
Publiquement, & du millieu estaint:
Si grande peste en ce lieu viendra naistre,
Que les iugeans fouyr seront constraint.
9.12 Le tant d'argent de Diane & Mercure,
Les simulachres au lac seront trouuez:
Le figulier cherchant argille neufue
Lui & les siens d'or seront abbreuez.
9.13 Les exilez autour de la Soulongne
Conduis de nuit pour marcher a Lauxois,
Deux de Modene truculent de Bologne,
Mys descouuers par feu de Burancoys.
9.14 Mys en planure chaulderons d'infecteurs,
Vin, miel & huyle & bastis sur forneaulx
Seront plongez sans mal dit mal facteurs
Sept fum extaint au canon des borneaux.
9.15 Pres de Parpan les rouges detenus,
Ceux du milieu parfondrez menez loing:
Trois mis en pieces, & cinq mal soustenus,
Pour le Seigneur & Prelat de Bourgoing.
9.16 De castel Franco sortira l'assemblee,
L'ambassadeur non plaisant fera scisme:
Ceux de Ribiere seront en la meslee,
Et au grand goulphre desnier ont l'entree.
9.17 Le tiers premier pys que ne feit Neron,
Vuidex vaillant que sang humain respandre:
R’edifier fera le forneron,
Siecle d'or, mort, nouueau roy grand esclandre.
9.18 Le lys Dauffois portera dans Nansy,
Iusques en Flandres electeur de l'empire
Neufue obturee au grand Montmorency,
Hors lieux prouez deliure a clere peyne.
9.19 Dans le millieu de la forest Mayenne,
Sol au lyon la fouldre tombera:
Le grand bastard yssu du gran du Maine,
Ce iour fougeres pointe en sang entrera.
9.20 De nuit viendra par la forest de Reines,
Deux pars vaultorte Herne la pierre blanche.
Le moine noir en gris dedans Varennes,
Esleu cap. cause tempeste feu, sang tranche.
9.21 Au temple hault de Bloys sacre Solonne,
Nuict pont de Loyre, prelat, roy pernicant:
Curseur victoire aux marestz de la lone,
Dou prelature de blancs a bormeant
9.22 Roy & sa court au lieu de langue halbe,
Dedans le templevis a vis du palais:
Dans le iardin Duc de Mantor & d'Albe,
Albe & Mantor poignard langue & palais
9.23 Puisnay iouant au fresch dessouz la tonne,
Le hault du toict du milieu sur la teste,
Le pere roy au temple saint Solonne,
Sacrifiant sacrera fum de feste.
9.24 Sur le palais au rochier des fenestres,
Seront rauis les deux petits royaux:
Passer aurelle Luthece Denis cloistres,
Nonain, mallods aualler verts noyaulx.
9.25 Passant les pontz venir pres des rosiers,
Tard arriue' plustost qu'il cuydera,
Viendront les noues espaignolz a Besiers,
Qui icelle chasse emprinse cassera.
9.26 Nice sortie sur nom des letres aspres,
La grande cappe fera present non sien:
Proche de vultry aux murs de vertes capres,
Apres plombin le vent a bon essien.
9.27 De bois la garde vent cloz rond pont sera,
Hault le receu frappera le Daulphin,
Le vieux teccon bois vnis passera,
Passant plus oultre du duc le droit confin.
9.28 Voille Symacle port Massiliolique,
Dans Venise port marcher aux Pannons:
Partir du goulfre & sinus Illirique,
Vast a Socile, Ligurs coups de canons.
9.29 Lors que celuy qu'a nul ne donne lieu,
Abandonner vouldra lieu prins non prins:
Feu nef par saignes, bitument a Charlieu,
Seront Quintin Balez reprins.
9.30 Au port de PVOLA & de saint Nicolas,
Perir Normande au goulfre Phanaticque,
Cap. de Bisance raues crier helas,
Secors de Gaddes & du grand Philipique.
9.31 Le tremblement de terre a Mortara,
Cassich saint George a demy perfondrez:
Paix assoupie la guerre esueillera,
Dans temple a Pasques abysmes enfondrez.
9.32 De fin porphire profond collon trouuee
Dessoubz la laze escriptz capitolin:
Os poil retors Romain force prouuee,
Classe agiter au port de Methelin.
9.33 Hercules Roy de Romme & d'Annemarc,
De Gaule trois Guion surnomme',
Trembler l'Itale & l'vnde de sainct Marc,
Premier sur tous monarque renomme'.
9.34 Le part soluz mary sera mittre',
Retour conflict passera sur le thuille:
Par cinq cens vn trahyr sera tiltre'
Narbon & Saulce par coutaux auons d'huille.
9.35 Et Ferdinand blonde sera descorte,
Quitter la fleur, suyure le Macedon,
Au grand besoing defaillira sa routte,
Et marchera contre le Myrmidon.
9.36 Vn grand Roy prins entre les mains d'vn Ioyne,
Non loing de Pasque confusion coup cultre:
Perpet. captifs temps que fouldre en la husne,
Lors que trois freres se blesseront & murtre.
9.37 Pont & molins en Decembre versez,
En si haut lieu montera la Garonne:
Murs, edifices, Tholose renuersez,
Qu'on ne scaura son lieu autant matronne.
9.38 L'entree de Blaye par Rochelle & l'Anglois,
Passera outre le grand Aemathien:
Non loing d'Agen attendra le Gaulois,
Secours Narbonne deceu par entretien.
9.39 En Arbissel a Veront & Carcari,
De nuict conduitz pour Sauonne atraper,
Le vifz Gascon Turbi, & la Scerry:
Derrier mur vieux & neuf palais gripper.
9.40 Pres de Quintin dans la forest bourlis,
Dans l'abbaye seront Flamens ranches:
Les deux puisnais de coups my estourdis,
Suitte oppressee & garde tous aches.
9.41 Le grand Chyren soy saisir d'Auignon,
De Romme letres en miel plein d'amertume
Letre ambassade partir de Chanignon,
Carpentras pris par duc noir rouge plume.
9.42 De Barcellonne, de Gennes & Venise
De la Secille peste Monet vnis:
Contre Barbare classe prendront la vise,
Barbar, poulse bien loing iusqu'a Thunis.
9.43 Proche a descendre l'armee Crucigere,
Sera guettee par les Ismaelites,
De tous cottez batus par nef Rauiere,
Prompt assaillis de dix galeres eslites.
9.44 Migres, migre de Genefue trestous.
Saturne d'or en fer se changera,
Le contre RAYPOZ exterminera tous,
Auant l'a ruent le ciel signes fera.
9.45 Ne sera soul iamais de demander,
Grand Mendosus obtiendra son empire:
Loing de la cour fera contremander
Pymond, Picard, Paris Tyrron le pire.
9.46 Vuydez, fuyez de Tholose les rouges,
Du sacrifice faire expiation.
Le chef du mal dessouz l'vmbre des courges:
Mort estrangler carne omination.
9.47 Les soulz signez d'indigne deliurance,
Et de la multe auront contre aduis:
Change monarque mis en perille pence,
Serrez en caige se verront vis a vis.
9.48 La grand cite' d'occean maritime,
Enuironnee de maretz en cristal:
Dans le solstice hyemal & la prime,
Sera temptee de vent espouuental.
9.49 Gand & Bruceles marcheront contre Enuers,
Senat de Londres mettront a mort leur roy:
Le sel & vin luy seront a l'enuers,
Pour eux auoir le regne en desarroy.
9.50 Mandosus tost viendra a son hault regne,
Mettant arriere vn peu de Norlaris:
Le rouge blaisme, le masle a l'interregne,
Le ieune crainte & frayeur Barbaris.
9.51 Contre les rouges sectes se banderont,
Feu, eau, fer, corde par paix se minera:
Au point mourir ceux qui machineront,
Fors vn que monde sur tout ruynera.
9.52 La paix s'approche d'vn coste', & la guerre,
Oncques ne feut la poursuitte si grande:
Plaindre homme, femme sang innocent par terre,
Et ce sera de France a toute bande.
9.53 Le Neron ieune dans le trois cheminees,
Fera de paiges vifz pour ardoir getter:
Heureux qui loing sera de telz menees,
Trois de son sang le feront mort guetter.
9.54 Arriuera au port de Corsibonne,
Pres de Rauenne, qui pillera la dame:
En mer profonde legat de la Vlisbonne,
Souz roc cachez rauiront septante ames.
9.55 L'horrible guerre qu'en l'occident s'apreste,
L'an ensuiuant viendra la pestilence
Si fort horrible que ieune, vieulx, ne beste,
Sang, feu, Mercure, Mars, Iupiter en France.
9.56 Camp pres de Noudam passera Goussan ville,
Et a Maiotes laissera son enseigne:
Conuertira en instant plus de mille,
Cherchant les deux remettre en chaine & legne
9.57 Au lieu de DRVX vn Roy reposera,
Et cherchera loy changeant d'Anatheme:
Pendant le ciel si tresfort tonnera,
Portee neufue Roy tuera soymesme.
9.58 Au coste' gauche a l'endroit de Vitry,
Seront guettez les trois rouges de France:
Tous assoumez rouge, noir non murdry,
Par les Bretons remis en asseurance.
9.59 A la Ferte' prendra la Vidame,
Nicol tenu rouge qu'auoit produit la vie:
La grand Loyse naistra que fera clame,
Donnant Bourgongne a Bretons par enuie.
9.60 Conflict Barbar en la Cornere noire,
Sang espandu trembler la d’Almatie:
Grand Ismael mettra son promontoire,
Ranes trembler secours Lusitanie.
9.61 La pille faite a la coste marine,
In cita noua & parenz amenez.
Plusieurs de Malte par le fait de Messine,
Estroit serrez seront mal guerdonnez.
9.62 Au grand de Cheramon agora,
Seront croisez par ranc tous attachez,
Le pertinax Oppi, & Mandragora,
Raugon d'Octobre le tiers seront laschez.
9.63 Plainctes & pleurs crys, & grands urlemens
Pres de Narbon a Bayonne & en Foix,
O quel horrible calamitz changemens,
Auant que Mars reuolu quelques foys.
9.64 L'Aemathion passer montz Pyrennees,
En Mars Narbon ne fera resistance,
Par mer & terre fera si grand menee,
Cap. n'ayant terre seure pour demeurance.
9.65 Dedans le coing de luna viendra rendre
Ou sera prins & mys en terre estrange.
Les fruitz immeurs seront a grand esclandre,
Grand vitupere a l'vn grande louange.
9.66 Paix, vnion sera & changement,
Estatz, offices bas hault & hault bien bas
Dresser voiage le fruict premier torment,
Guerre cesser, ciuil proces debatz
9.67 Du hault des montz a l'entour de Lizer
Port a la roche Valen. cent assemblez
De chasteau neuf pierre late en donzere.
Contre le crest Romans foy assemblez
9.68 Du mont Aymar sera noble obscurcie,
Le mal viendra au ioinct de sonne & rosne:
Dans bois caichez soldatz iour de Lucie
Qui ne fut onc vn si horrible throsne.
9.69 Sur le mont de Bailly & la Bresle
Seront caichez de Grenoble les fiers
Oultre Lyon, Vien. eulx si grande gresle.
Langoult en terre n'en restera vn tiers.
9.70 Harnois trenchans dans les flambeaux cachez,
Dedans Lyon, le iour du Sacrement,
Ceux de Vienne seront trestous hachez,
Par les cantons Latins Mascon ne ment.
9.71 Aux lieux sacrez animaux veu a trixe,
Auec celuy qui n'osera le iour.
A Carcassonne pour disgrace propice,
Sera pose' pour plus ample seiour.
9.72 Encor seront les saincts temples pollus,
Et expillez par Senat Tholossain,
Saturne deux trois cicles reuollus.
Dans Auril, May, gens de nouueau leuain.
9.73 Dans Fois entrez Roy ceiulee Turbao:
Et regnera moins reuolu Saturne,
Roy Turban blanc Bizance coeur ban,
Sol, Mars, Mercure pres la hurne.
9.74 Dans la cite' de Fertsod homicide,
Fait & fait multe beuf arant ne macter,
Retour encores aux honneurs d'Artemide
Et a Vulcan corps morts sepulturer.
9.75 De l'Ambraxie & du pays de Thrace
Peuple par mer, mal & secours Gaulois,
Perpetuelle en Prouence la trace,
Auec vestiges de leur coustume & loix.
9.76 Auec le noir Rapax & sanguinaire,
Yssu du peaultre de l'inhumain Neron,
Emmy deux fleuues main gauche militaire,
Sera murtry par Ioyne chaulueron.
9.77 Le regne prins le Roy conuiera
La dame prinse a mort iurez a sort,
La vie a Royne fils on desniera,
Et la pellix au fort de la consort.
9.78 La dame Grecque de beaute' laydique,
Heureuse faicte de procs innumerable,
Hors translatee au regne Hispanique,
Captiue prinse mourir mort miserable.
9.79 Le chef de classe par fraude stratageme,
Fera timides sortir de leurs galleres,
Sortis murtris chef renieur de cresme,
Puis par l'embusche luy rendront les saleres.
9.80 Le Duc voudra les siens exterminer,
Enuoyera les plus forts lieux estranges:
Par tyrannie Pize & Luc ruiner,
Puis les Barbares sans vin feront vendanges.
9.81 Le Roy ruse' entendra ses embusches,
De trois quartiers ennemis assaillir:
Vn nombre estrange larmes de coqueluches,
Viendra Lemprin du traducteur faillir
9.82 Par le deluge & pestilence forte,
La cite' grande de long temps assiegee:
La sentinelle & garde de main morte,
Subite prinse, mais de nul oultragee.
9.83 Sol vingt de taurus si fort terre trembler,
Le grand theatre rempli ruinera:
L'air, ciel & terre obscurcir & troubler,
Lors l'infidelle Dieu & sainctz voguera.
9.84 Roy expose' parfaira L'hecatombe,
Apres auoir trouue' son origine:
Torrent ouurir de marbre & plomb la tombe,
D'vn grand Romain d'enseigne Medusine.
9.85 Passer Guienne, Languedoc & le Rosne,
D'Agen tenens de Marmande & la Roole:
D'ouurir par foy parroy, Phocen tiendra son trosne
Conflit aupres saint Pol de Manseole.
9.86 Du bourg Lareyne paruiendront droit a Chartres,
Et feront pres du pont Authoni panse
Sept pour la paix cautelleux comme martres,
Feront entree d'armee a Paris clause.
9.87 Par la forest du Touphon essartee,
Par hermitaige sera pose' le temple,
Le duc d'Estampes par sa ruse inuentee.
Du mont Lehori prelat donra exemple.
9.88 Calais, Arras secours a Theroanne,
Paix & semblant simulera lescoutte,
Soulde d'Alabrox descendre par Roane.
Destornay peuple qui desfera la routte.
9.89 Sept ans sera Philip. fortune prospere.
Rabaissera des Arabes l'effaict,
Puis son mydi perplex rebors affaire,
Ieune ognyon abysmera son fort.
9.90 Vn capitaine de la grand Germanie
Se viendra rendre par simule' secours
Au Roy des roys ayde de Pannonie,
Que sa reuolte fera de sang grand cours.
9.91 L'horrible peste Perynte & Nicopolle,
Le Chersonnez tiendra & Marceloyne,
La Thessalie vastera l'Amphipolle,
Mal incogneu, & le refus d'Anthoine.
9.92 Le Roy vouldra dans cite' neufue entrer,
Par ennemys expugner lon viendra
Captif libere faulx dire & perpetrer,
Roy dehors estre, loin d'ennemys tiendra.
9.93 Les ennemis du fort bien eslongnez,
Par chariots conduict le bastion.
Par sur les murs de Bourges esgrongnez
Quand Hercules battra l'Haemathion.
9.94 Foibles galleres seront vnies ensemble,
Ennemis faux le plus fort en rampart:
Faible assaillies Vratislaue tremble,
Lubecq & Mysne tiendront barbare part.
9.95 Le nouueau faict conduyra l'exercice,
Proche apame' iusques au pres du riuage:
Tendant secour de Milannoile eslite,
Duc yeux priue' a Milan fer de cage.
9.96 Dans cite' entrer exercit desniee,
Duc entrera par persuasion,
Aux foibles portes clam armee amenee,
Mettront feu, mort de sang effusion.
9.97 De mer copies en trois parts diuisees,
A la seconde les viures failleront,
Desesperez cherchant champs Helisees,
Premiers en breche entrez victoire auront.
9.98 Les affligez par faute d'vn seul taint,
Contremenant a partie opposite,
Aux Lygonnois mandera que contraint
Seront de rendre le grand chef de Molite.
9.99 Vent Aquilon fera partir le siege,
Par murs geter cendres, chauls, & pousiere:
Par pluye apres qui leur fera bien piege,
Dernier secours encontre leur frontiere.
9.100 Naualle pugne nuit sera superee.
Le feu aux naues a l'Occident ruine:
Rubriche neufue, la grand nef coloree,
Ire a vaincu, & victoire en bruine.
