10.1 A L'ennemy l'ennemy foy promise
Ne se tiendra, les captifs retenus:
Prins preme mort, & le reste en chemise.
Damne' le reste pour estre soustenus
10.2 Voille gallere voil de nef cachera,
La grande classe viendra sortir la moindre,
Dix naues proches le torneront poulser,
Grande vaincue vnies a soy ioindre.
10.3 En apres cinq troupeau ne mettra hors vn
Fuytif pour Penelon l’aschera,
Faulx murmurer, secours venir par lors,
Le chef le siege lors habandonnera.
10.4 Sus la minuict conducteur de l'armee
Se sauiuera, subit esuanouy,
Sept ans apres la fame non blasmee,
A son retour ne dira oncq ouy.
10.5 Albi & Castres feront nouuelle ligue,
Neuf Arriens Lisbon & Portugues,
Carcas, Tholosse consumeront leur brigue,
Quand chief neuf monstre de Lauragues.
10.6 Sardon Nemans si hault desborderont,
Qu'on cuidera Deucalion renaistre.
Dans le collosse la plus part fuyront,
Vesta sepulchre feu estaint apparoistre.
10.7 Le grand conflit qu'on appreste a Nancy,
L'aemathien dira tout ie soubmetz,
L'isle Britanne par vin, sel en solcy:
Hem. mi deux Phi. long temps ne tiendra Metz.
10.8 Index & poulse parfondera le front,
De Senegalia le Conte a son filz propre,
La Myrnarmee par plusieurs de prinfront,
Trois dans sept iours blesses mors.
10.9 De Castillon figuieres iour de brune,
De feme infame naistra souuerain prince:
Surnom de chausses perhume luy posthume,
Onc Roy ne feut si pire en sa prouince.
10.10 Tasche de murdre, enormes adulteres,
Grand ennemy de tout le genre humain:
Que sera pire qu'ayeulx, oncles, ne peres,
En fer, feu, eau, sanguin & inhumain
10.11 Dessoubz Ionchere du dangereux passage,
Fera passer le posthume sa bande.
Les monts Pyrens passer hors son bagaige,
De Parpignam courira duc a tende.
10.12 Esleu en Pape, d'esleu sera mocque',
Subit soudain esmeu prompt & timide,
Par trop bon doulx a mourir prouocque',
Crainte estainte la nuit de sa mort guide.
10.13 Soulz la pasture d'animaux ruminant,
Par eux conduicts au ventre herbipolique,
Soldatz caichez, les armes bruit menant,
Non loing temptez de cite' Antipolique
10.14 Vrnel Vaucile sans conseil de soy mesmes,
Hardit timide par crainte prins vaincu,
Accompaigne' de plusieurs putains blesmes.
A Barcellonne aux chartreux conuaincu.
10.15 Pere duc vieux d'ans & de soif charge',
Au iour extreme filz desniant les guiere.
Dedans le puis vif mort viendra plonge'.
Senat au fil la mort longue & legiere.
10.16 Heureux au regne de France, heureux de vie,
Ignorant sang mort fureur & rapine:
Par non flateurs seras mys en enuie,
Roy desrobe', trop de foy en cuisine.
10.17 La royne Ergaste voiant sa fille blesme,
Par vn regret dans l'estomach encloz:
Crys lamentables seront lors d'Angolesme,
Et au germain mariage fortclos.
10.18 Le ranc Lorrain fera place a Vendosme,
Le hault mys bas & le bas mys en hault,
Le filz de Hamon sera esleu dans Rome,
Et les deux grands seront mys en deffault.
10.19 Iour que sera par royne saluee,
Le iour apres se salut, la priere:
Le compte fait raison & valbuee,
Par auant humble oncques ne feut si fiere.
10.20 Tous les amys qu'auront tenu party,
Pour rude en lettres mys mort & saccage'.
Biens publiez par fixe grand neanty,
Onc Romain peuple ne feut tant outrage'
10.21 Par le despit du Roy soustenant moindre,
Sera meurdry luy presentant les bagues:
Le pere au filz voulant noblesse poindre,
Fait comme a Perse iadis feirent les Magues.
10.22 Pour ne vouloir consentir au diuorce,
Qui puis apres sera cogneu indigne:
Le roy des Isles sera chasse' par force,
Mis a son lieu qui de roy n'aura signe.
10.23 Au peuple ingrat faictes les remonstrances.
Par lors l'armee se saisira d'Antibe,
Dans l'arc Monech feront les doleances,
Et a Freius l'vn l'autre prendra ribe.
10.24 Le captif prince aux Italles vaincu
Passera Gennes par mer iusqu'a Marseille,
Par grand effort des forens suruaincu
Sauf coup de feu barril liqueur d'abeille
10.25 Par Nebro ouurir de Bisanne passage,
Bien eslongnez el tago fara muestra,
Dans Pelligouxe sera commis l'outrage,
De la grand dame assise sur l'orchestra
10.26 Le successeur vengera son beau frere,
Occuper regne souz vmbre de vengeance,
Occis ostacle son sang mort vitupere,
Long temps Bretaigne tiendra auec la France.
10.27 Par le cinquieme & vn grand Hercules
Viendront le templeouurir de main bellique,
Vn Clement, Iule & Ascans recules,
Lespe, clef, aigle, n'eurent onc si grand picque.
10.28 Second & tiers qui font prime musicque
Sera par Roy en honneur sublimee,
Par grasse & maigre presque demy eticque
Raport de Venus faulx randra deprimee.
10.29 De Pol MANSOL dans cauerne caprine
Cache' & prins extrait hors par la barbe,
Captif mene’ comme beste mastine
Par Begourdans amenee pres de Tarbe.
10.30 Nepueu & sang du sainct nouueau venu,
Par le surnom soustient arcs & couuert
Seront chassez mis a mort chassez nu,
En rouge & noir conuertiront leur vert.
10.31 Le saint empire viendra en Germanie
Ismaelites trouueront lieux ouuerts,
Anes voudront aussi la Carmanie
Les soustenens de terre tous couuerts.
10.32 Le grand empire chacun an deuoir estre,
Vn sur les autres le viendra obtenir:
Mais peu de temps sera son regne & estre,
Deux ans aux naues se pourra soustenir.
10.33 La faction cruelle a robbe longue,
Viendra cacher souz les pointus poignars,
Saisir Florence le duc & lieu diphlongue,
Sa descouuerte par immeurs & flangnards.
10.34 Gauloys qu'empire par guerre occupera,
Par son beau frere mineur sera trahy:
Pour cheual rude voltigeant traynera,
Du fait le frere long temps sera hay.
10.35 Puysnay royal flagrand d'ardant libide,
Pour se iouyr de cousine germaine:
Habit de femme au temple d'Arthemide,
Allant murdry par incognu du Marne.
10.36 Apres le Roy du soucq guerres parlant,
L'isle Harmotique le tiendra a mespris:
Quelques ans bons rongeant vn & pillant,
Par tyrannie a l'isle changeant pris.
10.37 L'assemblee grande pres du lac de Borget,
Se ralieront pres du Montmelian:
Marchans plus outre pensifz feront proget
Chambry, Moriane combat saint Iulian.
10.38 Amour alegre non loing pose le siege.
Au saint barbar seront les garnisons:
Vrsins Hadrie pour Gaulois feront plaige,
Pour peur rendus de l'armee aux Grisons.
10.39 Premier fils vefue malheureux mariage,
Sans nuls enfans deux Isles en discord:
Auant dixhuict incompetant eage,
De l'autre pres plus bas sera l'accord.
10.40 Le ieune nay au regne Britannique,
Qu'aura le pere mourant recommande,
Iceluy mort LONOLE donra topique,
Et a son fils le regne demande.
10.41 En la frontiere de Caussade & Charlus,
Non guieres loing du fonds de la vallee:
De ville Franche musicque a son de luths,
Enuironnez combouls & grand myttee.
10.42 Le regne humain d'anglique geniture,
Fera son regne paix vnion tenir:
Captiue guerre demy de sa closture,
Long temps la paix leur fera maintenir.
10.43 Le trop bon temps trop de bonte' royalle,
Fais & deffais prompt subit negligence.
Legier croira faux d'espouse loyalle,
Luy mis a mort par sa beneuolence.
10.44 Par lors qu'vn Roy sera contre les siens,
Natif de Bloys subiuguera Ligures,
Mammel, Cordube & les Dalmatiens,
Des sept puis l'ombre a Roy estrennes & lemures.
10.45 L’ombre du regne de Nauarre non vray,
Fera la vie de sort illegitime:
La veu promis incertain de Cambray,
Roy Orleans donra mur legitime.
10.46 Vie soit mort de L’OR vilaine indigne,
Sera de Saxe non nouueau electeur:
De Brunsuic mandra d'amour signe,
Faux le rendant au peuple seducteur.
10.47 De Bourze ville a la dame Guyrlande,
L'on mettra sus par la trahison faicte
Le grand prelat de Leon par Formande,
Faux pellerins & rauisseurs defaicte.
10.48 Du plus profond de l'Espaigne enseigne,
Sortant du bout & des fins de l'Europe,
Troubles passant aupres du pont de Laigne,
Sera deffaicte par bande sa grand troppe.
10.49 Iardin du monde au pres de cite' neufue,
Dans le chemin des montaignes cauees:
Sera saisi & plonge' dans la Cuue,
Beuuant par force eaux soulfre enuenimees.
10.50 La Meuse au iour terre de Luxembourg,
Descouurira Saturne & trois en lurne:
Montaigne & pleine, ville, cite' & bourg,
Lorrain deluge trahison par grand hurne.
10.51 Des lieux plus bas du pays de Lorraine
Seront des basses Allemaignes vnis:
Par ceux du siege Picards, Normans, du Maisne,
Et aux cantons se seront reunis.
10.52 Au lieu ou LAYE & Scelde se marient,
Seront les nopces de long temps maniees:
Au lieu d'Anuers ou la crappe charient,
Ieune vieillesse consorte intaminee.
10.53 Les trois pellices de loing s'entrebatront,
La plus grand moindre demeurera a l'escoute:
Le grand Selin n'en sera plus patron,
Le nommera feu pelte blanche routte.
10.54 Nee en ce monde par concubine fertiue,
A deux hault mise par les tristes nouuelles,
Entre ennemis sera prinse captiue,
Et amene a Malings & Bruxelles.
10.55 Les malheureuses nopces celebreront
En grande ioye, mais la fin malheureuse,
Mary & mere nore desdaigneront,
Le Phybe mort, & nore plus piteuse.
10.56 Prelat royal son baissant trop tire',
Grand fleux de sang sortira par sa bouche,
Le regne Anglicque par regne respire',
Long temps mort vif en Tunys comme souche.
10.57 Le subleue' ne cognoistra son sceptre,
Les enfans ieunes des plus grands honnira:
Oncques ne fut vn plus ord cruel estre,
Pour leurs espouses a mort noir bannira.
10.58 Au temps du dueil que le felin monarque
Guerroyera le ieune Aemathien:
Gaule bransler perecliter la barque,
Tenter Phossens au Ponant entretien.
10.59 Dedans Lyon vingtcinq d'vne alaine,
Cinq citoyens Germains, Bressans, Latins:
Par dessous noble conduiront longue traine.
Et descouuers par abbois de mastins.
10.60 Ie pleure Nisse, Mannego, Pize, Gennes,
Sauone, Sienne, Capue Modene, Malte:
Le dessus sang & glaiue par estrennes,
Feu, trembler terre eau,. malheureuse nolte.
10.61 Betta, Vienne, Emorte, Sacarbance,
Voudront liurer aux Barbares Pannone:
Par picque & feu, enorme violance,
Les coniurez descouuers par matrone.
10.62 Pres de Sorbin pour assaillir Ongrie,
L'herault de Brude les viendra aduertir:
Chef Bizantin, Sallon de Sclauonie,
A loy d'Arabes les viendra conuertir.
10.63 Cydron, Raguse, la cite' au sainct Hieron,
Reuerdira le medicant secours:
Mort fils de Roy par mort de deux heron,
L'Arabe, Ongrie feront vn mesme cours.
10.64 Pleure Milan, pleure Luques, Florance,
Que ton grand Duc sur le char montera,
Changer le siege pres de Venise s'aduance,
Lors que Colomne a Rome changera.
10.65 O vaste Romme ta ruyne s'approche,
Non de tes murs de ton sang & substance
L'aspre par lettres fera si horrible coche,
Fer poinctu mis a tous iusques au manche.
10.66 Le chef de Londres par regne l'Americh,
L'isle d'Escosse tempiera par gellee:
Roy Reb auront vn si faux antechrist,
Que les mettra trestous dans la meslee.
10.67 Le tremblement si fort au mois de May,
Saturne Caper, Iupiter, Mercure au beuf:
Venus aussi Cancer, Mars, en Nonnay,
Tombera gresle lors plus grosse qu'vn euf.
10.68 L'armee de mer deuant cite' tiendra,
Puis partira sans faire longue alee:
Citoyens grande proye en terre prendra,
Retourner classe reprendre grand emblee
10.69 Le fait luysant de neuf vieux esleue',
Seront si grand par midi aquilon:
De sa seur propre grande alles leue',
Fuyant murdry au buysson d'ambellon.
10.70 L'oeil par obiect fera telle excroissance,
Tant & ardante que tumbera la neige:
Champ arrouse' viendra en descroissance,
Que le primat succumbera a Rege.
10.71 La terre & l’air gelleront si grand eau,
Lors qu'on viendra pour ieudy venerer:
Ce qui sera iamais ne feut si beau,
Des quatre pars le viendront honnorer.
10.72 L'an mil neuf cens nonante neuf sept mois,
Du ciel viendra vn grand Roy deffraieur:
Resusciter le grand Roy d'Angolmois,
Auant apres Mars regner par bon heur.
10.73 Le temps present auecques le passe',
Sera iuge' par grand Iouialiste:
Le monde tard luy sera lasse',
Et desloial par le clerge' iuriste.
10.74 An reuolu du grand nombre septiesme,
Apparoistra au temps Ieux d'Hacatombe:
Non esloigne' du grand eage milliesme,
Que les entres sortiront de leur tombe.
10.75 Tant attendu ne reuiendra iamais,
Dedans l'Europe, en Asie apparoistra:
Vn de la ligue yssu du grand Hermes,
Et sur tous roys des orientz croistra.
10.76 Le grand senat discernera la pompe,
A l'vn qu'apres sera vaincu chasse':
Ses adherans seront a son de trompe
Biens publiez ennemys dechassez.
10.77 Trente adherans de l'ordre des quyrettes
Bannys leurs biens donnez ses aduersaires:
Tous leurs bienfais seront pour desmerites,
Classe espargie deliurez aux corsaires.
10.78 Subite ioye en subite tristesse,
Sera a Romme aux graces embrassees:
Dueil, cris, pleurs, larm. sang excellant liesse
Contraires bandes surprinses & troussees.
10.79 Les vieux chemins seront tous embelys,
Lon passera a Memphis somentree:
Le grand Mercure d'Hercules fleur de lys,
Faisant trembler terre, mer & contree.
10.80 Au regne grand du grand regne regnant,
Par force d'armes les grands portes d'arain:
Fera ouurir, le roy & duc ioignant,
Port demoly, nef a fons, iour serain.
10.81 Mys tresor temple citadins Hesperiques,
Dans iceluy retire' en secret lieu:
Le temple ouurir les liens fameliques,
Reprens, rauys proye horrible au milieu.
10.82 Cris, pleurs, larmes viendront auec coteaux,
Semblant fouyr, donront dernier assault,
Lentour parques planter profons plateaux,
Vifs repoulsez & meurdrys de prinsault.
10.83 De batailler ne sera donne' signe,
Du parc seront contraint de sortir hors:
De Gand lentour sera cogneu l'ensigne,
Qui fera mettre de tous les siens a mors.
10.84 La naturelle a si hault hault non bas,
Le tard retour fera marris contens:
Le Recloing ne sera sans debatz,
En empliant & perdant tout son temps.
10.85 Le vieil tribung au point de la trehemide
Sera pressee, captif ne desliurer,
Le veuil non veuil, le mal parlant timide,
Par legitime a ses amys liurer.
10.86 Comme vn gryphon viendra le roy d'Europe,
Accompaigne' de ceux d'Aquilon,
De rouges & blancz conduira grand troppe,
Et iront contre le roy de Babylon.
10.87 Grand roy viendra prendre port pres de Nisse,
Le grand empire de la mort si enfera
Aux Antipolles, posera son genisse,
Par mer la Pille tout esuanoira.
10.88 Piedz & Cheual a la seconde veille,
Feront entree vastient tout par la mer:
Dedans le poil entrera de Marseille,
Pleurs, crys, & sang, onc nul temps si amer.
10.89 De brique en mabre seront les murs reduits,
Sept & cinquante annees pacifiques:
Ioye aux humains, renoue' Laqueduict,
Sante', grandz fruict, ioye & temps melifique.
10.90 Cent foys mourra le tyran inhumain,
Mys a son lieu scauant & debonnaire,
Tout le senat sera dessoubz sa main,
Fasche' sera par malin temeraire.
10.91 Clerge' Romain l'an mil six cens & neuf,
Au chef de l'an feras election:
D'vn gris & noir de la Compagne yssu,
Qui onc ne feut si maling.
10.92 Deuant le pere l'enfant sera tue',
Le pere apres entre cordes de ionc,
Geneuois peuple sera esuertue,
Gisant le chief au milieu comme vn tronc.
10.93 La barque neufue receura les voyages,
La & aupres transfereront l'empire:
Beaucaire, Arles retiendront les hostages,
Pres deux colomnes trouuees de porphire
10.94 De Nismes, d'Arles, & Vienne contemner,
N'obey tout a l’edict Hespericque:
Aux labouriez pour le grand condamner,
Six eschappez en habit seraphicque.
10.95 Dans les Espaignes viendra Roy trespuissant,
Par mer & terre subiugant or midy:
Ce mal fera, rabaissant le croissant,
Baisser les aesles a ceux du vendredy.
10.96 Religion du nom des mers vaincra,
Contre la secte fils Adaluncatif,
Secte obstinee deploree craindra
Des deux blessez par Aleph & Aleph.
10.97 Triremes pleines tout aage captif,
Temps bon a mal, le doux pour amertume:
Proye a Barbares trop tost seront hastifs,
Cupid de veoir plaindre au vent la plume
10.98 La splendeur claire a pucelle ioyeuse,
Ne luyra plus, long temps sera sans sel:
Auec marchans, ruffiens loups odieuse,
Tous pesle mesle monstre vniuersel.
10.99 La fin le loup, le lyon, beuf, & l'asne,
Timide dama seront auec mastins:
Plus ne cherra a eux la douce manne,
Plus vigilance & custode aux mastins.
10.100 Le grand empire sera par Angleterre,
Le pempotam des ans plus de trois cens:
Grandes copies passer par mer & terre,
Les Lusitains n'en seront pas contens.
